Foru Aldundia aste batzuk barru hasiko da Urtegiko Ibilbide Berdeko Azua eta Langara arteko tartea hobetzeko obrak egiten. Lanak Construcciones Aguado Cabezudo SA enpresari esleitu zaizkio, 168.084,61 eurotan, BEZa barne.
Proiektuak plataforma hobetzea eta ezpondak eta zoladura finkatzea proposatzen du Urtegiko Ibilbide Berdean, 2.015 metroko tartean, Dehesa aurkintzaren eta Langara Ganboako herrigunearen artean.
Eremu horrek du erabilera intentsitate handiena, paisaian eta ingurumen aisialdian duen erakargarritasunagatik, urtegiaren iparraldeko sektorea inguratzen duen eraztunaren barruan. Eremu horren zati handi batean plataformak ez du azalera sendorik; beraz, udazkenean eta neguan, eta lehenengo euria egiten duenean, bidearen egoera eta ibilbidearen prestazioak kaltetu daitezke.
Amaia Barredo Jasangarritasun, Nekazaritza eta Natura Ingurunearen Saileko diputatuarentzat, esku hartze horrek «gure lurraldeko bitxirik garrantzitsuenetako bat hobetzea dakar. Helburua da arabarrek segurtasun eta erosotasun osoa izatea ibiltzean, paisaiaz eta bertako faunaz gozatzean eta urtegira hurbiltzean. Gure ur erreserba garrantzitsuenetako bat izateaz gain, urtegi horiek Euskal Autonomia Erkidegoko barruko hezegune garrantzitsuenetako bat dira, uretako hegaztiek negua igarotzeko eta ugaltzeko tokiak baitira, eta, beraz, harro gaude haietaz gozatzeaz».
Bestalde, ibilbide berdearen trazaduraren zati hori, urtegiaren eremu honetan ohikoak diren iparraldeko haize indartsuekiko orientazio eta esposizio bereziagatik, bereziki sentikorra da uraren olatuekiko eta haren higadurarekiko. Egoera horrek zenbait arazo sortarazi ditu, hala nola materialak erortzea eta plataformari eragiten dioten hondeaketak egotea ibilbidearen bi puntutan, eta konpondu beharrekoa da.
Uribarri Ganboako Urtegiko Ibilbide Berdea Arabako Ibilbide Berdeen Sarean gehien erabiltzen den ibilbideetako bat da. Iaz 100.000 erabiltzaile, txirrindulari eta oinezko inguru ibili ziren bertatik.
