Nafarroako Gobernuak doluminak ematen dizkie Agustín González García de Acilu musikagilearen familiari eta hurbilekoei. 2009an, Foru Komunitateko kultura sari handiena jaso zuen artistak: Kulturaren Vianako Printzea saria.
Sari honekin, XX. mendeko bigarren erdialdeko musikagile espainiar esanguratsuenetako bat aitortu zen, pedagogo eta musika-prestatzaile gisa ere lan handia egin zuena.
Agustín González García de Acilu Altsasun jaio zen 1929an. 1958an Kontrapuntu eta Fuga Saria lortu zuen. Iruñeko Kontserbatorioko zuzendari Fernando Remacha ezagutu zuen, eta hark animatu zuen «Vianako Printzea» Erakundearen beka-deialdira aurkez zedin. Aparteko laguntza honi esker, Europako musika bizitzan integratuko zen Parisen, Venezian (gobernu italiarraren beka bati esker) eta Erroman. Bidaia hauetan funtsezkoa izan zen bere laguna, Rafael Moneo arkitektoa. Besteak beste, Umberto Eco, Giulio Carlo Argan, Diego Fabbri eta Eduardo Sanguinetti entzuteko aukera izan zuten.
Erroman, konposizio-lana Godofredo Petrassirekin lantzen du, eta 1964an, Darmstadten, Pousseur, Lygete eta Babbitek zuzendutako «Internationale Ferienkurse für Neue Musik» -era gonbidatu zuten.
Urte horietan sari ugari irabazi zituen, besteak beste, «Samuel Ríos», «Sucesiones Superpuestas» hari-laukoteari esker; 1971n, Musikaren Sari Nazionala, «Oratorio Panlinguístico» lanari esker; eta 1967-1968 denboraldian, obra onenaren akzesita, «Aschermittwoch» (Errautsezko asteazkena) lanari esker. 1971n Radio Nacional de España ordezkatu zuen Italia sarian, «Interfonismos» lanarekin, eta UNESCOren konpositoreen tribunan, «Aschermittwoch» lanarekin. Espainiako Konpositore Sinfonikoen Elkarteko kide fundatzailea izan zen 1976an.
González García de Aciluren lan pedagogikoa hainbat musikagiletan nabaritu da, bereziki «Iruñako Taldea» osatzen dutenengan. Magisteritza zabala egin zuen Harmoniako irakasle gisa Madrilgo Goi Mailako Musika Kontserbatorioan, eta «XX. mendeko teknikak» irakasle gisa Iruñeko Pablo Sarasate Kontserbatorioan eta Oviedoko Unibertsitateko «Jovellanos» Katedran.
1998an, Musikako Sari Nazionala eman zioten berriro, konposizioan emandako bizitza osoa eta gure garaiko musikaren panoraman egindako ekoizpenaren benetako esanahia aitortzeko.
