Gaur goizean Euskadi Irratiko estudioetan egindako elkarrizketa batean, Osasun sailburu Gotzone Sagarduik iragarri du Osakidetzak 100 milioi euro inguru inbertituko dituela bi instalazio berri eraikitzeko. Instalazio horietan protoien erradioterapia-zentroa (Protonterapia), Onkologikoa berriari gehituko zaiona, eta Donostia Ospitaleko kanpo-kontsulten eraikin berri bat —eguneko ospitale bat barne hartuko du— ezarriko dira.
Sailburuak azaldu duenez, bi eraikinak elkarrekin konektatuta egongo dira, eta, aldi berean, Donostia Ospitalearekin eta Onkologikoarekin. Era horretan, osasun-gune berri bat sortuko da. Horrek asistentzia-maila nabarmen hobetzea ekarriko du, ez bakarrik Donostia inguruan, baita Euskadin eta probintzia mugakideetan ere, probintzia horiei Protonterapia-zerbitzua ere eman beharko baitzaie.
Obra hori Gipuzkoa pabilioiaren eta Onkologikoaren artean dagoen aparkalekuan egongo da. Minbiziaren tratamendurako unitatea 2026ko martxorako amaituta egongo dela aurreikusten da, eta kontsulten eraikina, berriz, 2027ko maiatzerako.
Protonterapia Unitatean —24 milioi euro inguruko exekuzio-kostua du— jarriko datumoreen aurrean abangoardiako eta doitasunezko tratamendua eskaintzeko aukera emango duen makina. Makina horrek erradiazio-dosia hobeto banatzea ahalbidetzen du eta ehun osasuntsuak kaltetzeko arriskua murrizten du.Sagarduiren ustez, unitate hori Euskadin izatea oso garrantzitsua da minbiziaren aurkako tratamenduan.
Protonterapiako makina Ospitalegunean kokatuko da, Osakidetzak kudeatutako zerbitzu batean, 28 milioi euroko balioa du, eta erreferentzia izango da Euskadi, Nafarroa, Errioxa eta Kantabriako autonomia-erkidegoetako, eta Burgos eta Soriako probintzietako herritarren osasun-laguntzarako.
Bestalde, Sagarduik azaldu duen bezala, Donostia Unibertsitate Ospitaleko Kanpo Kontsulten eraikin berria datorren urteko ekainean egiten hastea aurreikusten da. Instalazio horrek laguntza-zerbitzuak hobetuko ditu egungo joerekin bat etorriko den eraikin berri batean, eta beste eremu batzuk hazteko lekua lagako du ospitalean.Exekuzio-proiektua 2023ko abenduan amaitzea aurreikusten da, eta 72 milioi euro inguruko kostua izango du.
