Ertzaintzak bi gizon atxilotu ditu Bilbon lesio-delitu bat leporatuta, beste gazte bati labana batekin eraso egin ondoren. Zauritua ospitalera eraman behar izan dute, besoan larritasunik ez zuen ebakia baitzuen.
Gaur goizaldeko ordu bata aldera, larrialdietako zerbitzuek abisu bat jaso dute Bilbon, Uribitarteko aisialdiko gunean, borrokan ari zirela eta labanak zituztela esanez.
Lekura Ertzaintzaren patruilak eta osasun-zerbitzuak hurbildu dira, izan zitezkeen biktimak artatzeko eta erasotzaileak atzemateko, ihes egin baitute.
Herritarren laguntzari esker egindako lehenengo ikerketen ondoren, agenteek inguruan aurkitu dituzte ustezko erasotzaileei buruz emandako deskribapenarekin bat zetozen bi gizon. Gainera, patruilek odolduta zegoen labana bat ere aurkitu dute erasoa gertatu den lekutik hurbil. Susmagarriak identifikatu eta zegozkion frogaketak egin ondoren, bi gizonak, 22 eta 26 urtekoak, atxilotu eta polizia-egoitzara eraman dituzte dagozkion eginbideak betetzeko.
Atxilotuek pertsona bat baino gehiago mehatxatu duten arren, azkenean bakarra artatu behar izan dute besoan ebakia zuelako, eta ospitalera eraman behar izan dute, larritasunik ez zuen arren.
Atxilotuak ikerketapean daude arma zuriarekin lesioak eragiteagatik, eta datozen orduotan jarriko dituzte Bilboko Guardiako Epaitegiaren eskuetan.
