-
Euskadiko Klimaren eta Energiaren Astea Eusko Jaurlaritzako Ekonomiaren Garapen, Jasangarritasun eta Ingurumen Sailak bultzatu du, Ihobe eta EEE erakunde publikoen bitartez, eta 55 toki-erakundek eta 7 eskualde-erakundek parte hartuko dute, 935.665 biztanle biltzen dituztenak.
-
Hainbat eragile publikok eta pribatuk bultzatutako ekintzez gain, ASTEKLIMA AZOKA 9 udalerritan izango da (Bilbo, Donostia, Gasteiz, Bermeo, Trapagaran, Bakio, Irun, Zarautz eta Azpeitia) klimaren aldeko ekintzari buruz sentsibilizatzeko eta mobilizatzeko
ASTEKLIMAren IV. edizioak, herritarrak trantsizio energetiko eta klimatikoaren aurrean kontzientziatzea eta mobilizatzea helburu duen ekimenak, 230 jarduera inguru egingo ditu irailaren 22tik, ostirala, urriaren 1era, igandea. Hamar egunez, Euskadiko Klimaren eta Energiaren Asteak, Ihobe eta EEE erakunde publikoen bitartez Eusko Jaurlaritzako Ekonomiaren Garapen, Jasangarritasun eta Ingurumen Sailak sustatutako ekimenak, tokian tokiko ekintzan eta herritarren ekintzan jarriko du arreta, klima-aldaketaren eta trantsizio energetikoaren erronkari buruz sentsibilizatzeko eta herritarren agendan jartzeko; hori guztia premisa batekin: ‘Ekintza oro, txikia bada ere, garrantzitsua da’.
Ekimen horretan, ASTEKLIMAren helburuarekin bat datozen era guztietako jarduerak eta ekitaldiak antolatuko dira, eta 55 toki-erakundek eta 7 eskualde-erakundek parte hartuko dute, 935.665 biztanle biltzen dituztenak. Bizkaian 21 udalek eta Nerbioi-Ibaizabal Mankomunitateak hartzen dute parte; Araban 18 udalerrik eta Aiara, Gorbeia eta Añanako kuadrillek; eta Gipuzkoan 16 udalek eta Tolosaldea Garatzen, Urola Garaiko Garapenaren Agentzia eta Sasieta Mankomunitateak.
ASTEKLIMA 2023k 230 jarduera inguru izango ditu hiru euskal lurralde historikoetan zehar: tailerrak eta erakusketak, hitzaldiak, antzerkiak, escape room-ak, kontu-kontalariak, bisita gidatuak eta bideo- eta argazki-lehiaketak, publiko guztientzat. Ekintza horiei esker, parte-hartzaileek klima-aldaketak dakartzan erronketan murgildu ahal izango dute, eta tokian tokitik ekiteak duen garrantzia ulertu ahal izango dute, klimaren eta energiaren egungo eta etorkizuneko erronkei aurre egiteko.
ASTEKLIMA AZOKA, bederatzi udalerritan
ASTEKLIMAren IV. edizioak presentzia berezia izango du Euskadiko 9 udalerritan. Bertan, ASTEKLIMA AZOKA bisitatu ahal izango da, Ihobek, EEEk, Udalsarea 2030ek, Ekoetxea sareak eta LIFE Urban Klima 2050 proiektuak sustatuta, klimaren aldeko ekintzari buruz sentsibilizatzeko eta mobilizatzeko. Azoka ibiltaria izango da, eta 9 euskal udalerri bisitatuko ditu: Bilbo, Donostia, Gasteiz, Bermeo, Trapagaran, Bakio, Irun, Zarautz eta Azpeitia.
ASTEKLIMA AZOKAk hainbat karpa ditu eta, besteak beste, honako gai hauek jorratuko dituzte: klima-aldaketa, etxeko ohiturak, mugikortasuna, aisia eta kontsumoa, Urban Klima proiektua, eta gizarteko gainerakoen konpromisoekin bat egingo duen konpromiso pertsonala formalizatzeko modua.
ASTEKLIMA AZOKAren helburua da familiak kontzientziatzea klima-aldaketaren ondorioei buruz eta eguneroko ohiturak egokitzearen garrantziari buruz, keinu txikiekin ohitura horiek arintzen eta egokitzen laguntzeko. Pasaporte formako dinamika ludiko batean oinarrituko da azoka, hainbat proba garatuta: autodiagnostikoa, informazioa, jarduera posibleak eta abar.
Karpa bakoitzak gure eguneroko bizitzaren hainbat alderdiri eta klima-aldaketan duten eraginari buruz sentsibilizatzeko jokoak eskaintzen ditu. Azken helburua pertsona bakoitzak erronka bat bere gain hartzea da, ekintzaren batekin konprometitzea, alegia. Hori betetzea errazteko, aplikazio mugikor bat (app) garatu da, pertsona bakoitzari ohiturak aldatzen laguntzeko hurrengo 21 egunetan. Aplikazio horren edukien diseinua eta konpromisoa hartzeko herritarren keinuak Ihoberen “52 keinu klima-aldaketaren alde” argitalpenean oinarrituta daude.
ASTEKLIMA AZOKAk 9 udalerritan izango da data hauetan:
– Bilbo | 2023/09/22 | 16:00-20:00 | Emakumeen Azaroaren 25eko Plaza. Bailen kalea 1
– Bakio | 2023/09/23 | 10:00-13:00 | Bentalde auzoa. Sabino Arana etorbidea
– Trapagaran | 2023/09/23 | 17:00-20:00 | Arboleda
– Irun | 2023/09/24 | 10:00-14:00 | Zabalgune plaza
– Azpeitia | 2023/09/28 | 16:00-20:00 | Plaza Nagusia
– Vitoria-Gasteiz | 2023/09/29 | 16:00-20:00 | Santa Barbara plaza
– Donostia | 2023/09/30 | 10:00-13:00 | Gipuzkoa plaza
– Zarautz | 2023/09/30 | 17:30-20:00 | Itxas pasalekua-Matxitxako
– Bermeo | 2023/10/01 | 10:00-14:00 | Lamera parkea
ASTEKLIMAren jarduera gehiago
Ihobek eta EEEk, gainera, hainbat eragile inplikatzen dituzten beste era bateko ekitaldi batzuk sustatuko dituzte, astean zehar lurralde osoan zehar banatuko direnak.
Energiaren Euskal Erakundeak bisita gidatuak antolatu ditu Mutrikuko olatu plantako instalazioetara, irailaren 22an, goizez.
Ihoberen aldetik, irailaren 28an eta 29an, Argalarioko (Barakaldo) segurtasun-ziega bisitatu ahal izango da, eta teknikariek klima-aldaketaren ondorioak arintzeko lurzoruak duen funtsezko eginkizuna azalduko dute bertan. Bilboko Udalarekin lankidetzan, “Zirkularrak Circular Basque Exhibition” erakusketa bisitatu ahal izango da. Bertan, Euskadin ekodiseinatutako 140 produktu baino gehiago erakusten dira La Perrera zentroan.
Irailaren 29an, ingurumen-kazetaritzari buruzko jardunaldi bat egingo da Gasteizen, Vital Fundazioarekin batera Kazetarien Euskal Elkarteak eta Elkargoak antolatuta. Jardunaldi horretan parte hartuko dute: azken lau urteetako Ingurumeneko Euskal Kazetaritzako lau saridunek –Julen Rekondo, Gorka Belamendia, Eva Caballero eta Ramón Bustamante– eta Odile Rodríguez de la Fuente dibulgatzaile zientifikoak, Félix Rodríguez de la Fuente ingurumentalistaren alabak.
Film laburren lehiaketa: Klimametraje
Ihobek, bestetik, ASTEKLIMAn abian jarriko du klima-aldaketari buruzko film laburren “Klimametraje” gazte-lehiaketaren bigarren edizioa, herritarrak kontzientziatzeko, sentsibilizatzeko eta mobilizatzeko helburua duena. Lehiaketa horretan, euskal gazteak izango dira protagonista; izan ere, lehiaketara aurkeztutako film laburren bidez, klima-aldaketak Euskadin duen eraginari buruzko ikuspegia ezagutu ahal izango du euskal gizarteak, baita pertsona guztiek hura arintzen lagundu ahal izateko irtenbideak proposatu ere.
ASTEKLIMA 2023ren informazio eguneratu guztia, intereseko albisteak eta jardueren egutegia barne, Euskadiko Klimaren eta Energiaren Astearen webgune ofizialean kontsulta daiteke (www.asteklima.eus).
