Osalanek, Afa Insurance-ren eskaerari erantzunez, jaso du Barakaldoko egoitza nagusian Suediako aseguru kolektiboen konpainia garrantzitsu horretako 11 kideko ordezkaritza bat. Suediako lan-indarraren % 90 ziurtatzen du, eta 670 langile ditu. AFA Insurance irabazi-asmorik gabeko enpresa da, Suediako Enplegatzaileen Konfederazioaren, Suediako Sindikatuen Konfederazioaren eta Negoziazio eta Lankidetza Kontseiluaren baterako jabetzakoa. Gaixotasunagatik, lan-istripuagatik edo lan-urritasunagatik soldatak galduz gero, konpentsazio ekonomikoak ematen ditu, eta heriotzagatik kalte-ordainak ere ordaintzen ditu.
Afa Insurancek lantokiko lesioen eta osasun txarreko, desgaitasuneko eta heriotzako beste arrazoi batzuen prebentzioan ere jarduten du. Prebentzio-jardueren zati handi bat ikerketa- eta garapen-proiektuak finantzatzea da, langileen lan-baldintzak eta osasuna hobetuko dituen ezagutza handitu eta zabaltzeko.
Sektore publikoko laneko osasunarekin eta segurtasunarekin lotutako ikerketa-proiektuak AFAko aseguru-aholkularitza-taldeak berrikusten ditu, eta zer proiektu finantzatu beharko liratekeen azaltzen duten gomendioak ematen ditu. Talde hori sektore publikoko hainbat eremutako ordezkariek osatzen dute, eta azken urteotan azterketa-bisitak egin ditu EBko hainbat herrialdetara, sektore publikoak Suedian dituen arazoen antzekoak nola jorratzen dituzten jakiteko, hala nola lidergoa, lan-ingurune psikosozialaren arriskuak, estresa, osasunaren sustapena eta lantokiko mehatxuak eta indarkeria. Covid-19ak izan ditzakeen osasun eta lan ondorioak ere aztertu dituzte. Gainera, udazken honetan «Ongizatea lan-bizitzan» gaiari buruzko ikerketa-programa berri bat jarriko dute abian, eta «digitalizazioak lan-ingurunean dituen ondorioei» buruzko ikerketa- eta garapen-programaren azken etapetan daude. Gai hori Europako Segurtasun eta Osasun Agentziak aukeratu du datozen hiru urteetako kanpainetarako.
Esparru horretan, Afa Insurancek interesa agertu zuen Osalan gai eta arazo horietako batzuekin nola borrokatzen ari den jakiteko, bereziki sektore publikoari begira. Horrela, Suediako ordezkaritzari harrera egin diote Lan eta Gizarte Segurantzako sailburuorde Elena Pérezek eta Osalaneko zuzendari nagusi Lourdes Íscarrek, eta honako hauek aurkeztu zaizkie: Osalanen antolamendua eta eginkizunak, Laneko Segurtasun eta Osasunerako Euskal Estrategia 2021-2026, prestakuntza-jarduerak eta Osalanen Plana, laneko emakumeen eta gizonen berdintasunerako.
