- Gurpeguik Gizatea Euskal Herriko Laneratzeko Enpresen Elkartearen 2022 Memoriaren aurkezpenean parte hartu du gaur
Enplegu eta Gizarteratzeko sailburuorde Alfonso Gurpeguik gaur aurreratu duenez, laneratzeko enpresen kalifikazioa arautzen duen dekretu berriak, datozen asteetan onartuko denak, egoera ahulenean dauden pertsonen babesean sakonduko du, eta Lanbiderekiko bazterketa-egoerak egiaztatzeko prozedurak arinduko ditu prozesu osoaren erdigunean.
Gurpeguik Gizatea Euskal Herriko Laneratzeko Enpresen Elkartearen 2022 Gizarte Memoriaren aurkezpenean parte hartu du gaur, bere presidente eta koordinatzaile Marijose Rodríguez eta Joana Revillarekin batera. Aurten Donostiak duen Gizarte Ekonomiaren hiriburua dela eta, ekitaldi hau Lezoko enpresa industrial batean egin da.
2022ko datuak ezagutu ondoren, Enplegu eta Gizarteratze sailburuordeak nabarmendu duenez, «Gizatea, aukera gutxien dituzten pertsonak gizarteratzeko funtsezko eragilea izateaz gain, euskal gizarte osoaren aurrerapen ekonomikorako ezinbesteko tresna ere bada, ez baitago aurrerapen ekonomikorik gizarte-kohesiorik gabe». Horregatik, aurten ere, Gizateak aurkeztutako balantzeak «zailtasunak gainditzeko gai izan garela eta etorkizunari aurre egiteko konfiantzazko motorra dela» erakusten duela uste du.
Esparru horretan, Gurpeguik aurreratu du laster onartuko dela laneratzeko enpresen kalifikazioa arautzen duen dekretua. Dekretu berri horrek egungo beharrei erantzuten die, laneratzeko enpresei sarbidea erraztuko die eta gizarteratzeko ibilbideak garatzen lagunduko du. Ildo horretan, berretsi du hura egitea gidatu duten oinarrizko irizpideak direla, batetik, laneratzeko enpresa batek kontrata ditzakeen pertsonen kolektiboak zabaltzea, egoera ahulenean dauden pertsonen babesean sakonduz. Eta, bestetik, bazterketa-egoera eraginkorragoak eta arinagoak egiaztatzeko prozesuak ezartzea, izapideak sinplifikatuz edo argituz eta Lanbide prozesu osoaren erdigunean jarriz.
Lan eta Enplegu Sailak laneratzeko enpresekin, Enplegu Zentro Bereziekin edo Gizarte Ekonomiako gainerako formulekin duen konpromisoa azpimarratzeaz gain, sailburuordeak aspaldidatik Gizatearekin duen lankidetzari buruz hitz egin du. Bertan kokatu ditu laguntza-tresnei edo enplegu normalizaturako igarobideari buruzko azterlanak, edo aurten bertan eremu behartsuetan eta landa-inguruneetan laneratzeko enpresak sortzea sustatzeko egiten ari direnak, egiaztatu baita ez dagoela lurralde-banaketa homogeneorik, hiriburuetan eta hirigune handietan baitaude.
Era berean, urteko azken hiruhilekoan Enpleguari buruzko Euskal Legea onartu izanari buruz hitz egin du; izan ere, Diru-sarrerak Bermatzeko eta Gizarteratzeko eta Eraldatzeko Euskal Sistemaren Legea onartuta dagoenarekin batera, egungo legegintzaldiaren espiritu eraldatzailea islatzen dute. Enpleguaren Legeak, gaineratu duenez, «herritartasun-eskubideak zabalduko ditu, pertsona guztiek, langabetuek eta okupatuek, bermatuta izango baitute Lanbideren laguntza pertsonal hori; arlo publikoa indartuko du, Lanbideren zerbitzua, eta hobeto antolatuko ditu arlo horretan jarduten dugun eragile instituzional, sozial eta ekonomiko guztiak, eraginkorragoak izan daitezen».
