- Hainbat diziplinatan lehiatuko dira 9 egunetan: atletismoan, arte martzialetan, igeriketan, tiroan, padelean, arraunean, boxeoan, txirrindularitzan eta powerlifting eta crossfit modalitateetan
Ertzaintzako 34 kirolariz osatutako taldeak Torreviejan (Alacanten) gaur, irailak 29, hasita urriaren 7ra bitartean egingo diren “European Police & Fire Games” jokoetan parte hartuko du. Hogeita hamar herrialdetako baino gehiagotako beste 3.000 pertsonarekin batera lehiatuko dira Eusko Jaurlaritzak emandako ekipamenduarekin. Ikurrinaren koloreak dituen ekipamenduan “Ertzaintza” eta “Euskadi-Basque Country” jartzen du.
Euren diziplinetako federazioan fitxa duten 8 emakume eta 26 gizon dira, esperientzia handia dutenak euren espezialitateetako bakoitzean: atletismoan, arte martzialetan (taekwondo eta jiu jitsu), igeriketan, arraunean, tiroan, padelean, txirrindularitzan, boxeoan eta crossfit eta powerlifting modalitateetan.
Ertzaintzak esperientzia handia du era honetako nazioarteko kirol-norgehiagoketetan. Zehazki, 1997an hasi zen polizien eta suteak itzaltzeko zerbitzuen Europako joko horietan parte hartzen, eta joan den uztailean Winnipeg hirian, Kanadan, egin ziren azken “World Police and Fire Games” jokoak kontuan hartuta, guztira 271 domina lortu ditu.
20.000 euroko laguntzak
Eusko Jaurlaritzak 20.000 eurora arteko laguntza onartu du 2023rako Europako eta nazioarteko joko horietan parte hartuko duten ertzainen gastuen zati bat ordaintzen laguntzeko.
Lehiaketa horiek mundu osoko polizia-agenteen eta suhiltzaileen artean esperientziak trukatzea ahalbidetzen dute, eta Eusko Jaurlaritzaren helburua da, beraz, Ertzaintzako agenteek segurtasun-zerbitzu publikoen artean adiskidetasuna sustatzeko topaketa horietan parte hartzea bultzatzea.
Erakundeen babes horrekin forma fisiko eta profesional onean egotea ere sustatu nahi da.
