Javier Hurtado Turismo, Merkataritza eta Kontsumoko sailburuak “Zinemaldiko kazetaritza-lanaren aipamena” entregatu du, Zinemaldia betetzen duten kazetariek Euskadi helmuga sustatzeko egiten duten lanagatik. Aurtengo edizioan, Alicia García Arribas eta Alfonso Rivera kazetariei eman zaie saria, Donostiako Zinemaldian ohikoak diren bi kazetariri, beren “kazetaritza-lanaren bidez Euskadiren aberastasuna eta aniztasuna modu berezian transmititzen” egindako lanagatik.
Sailburuak gogorarazi du hainbat faktorek laguntzen dutela Euskadi sustatzen. “Zuek zaudete, zeuen kroniken bidez. Erakundeak gaude, Euskadi sustatzen.Eta Euskadira etorri eta kontatu egiten duenaren esperientzia bera dago, eta bisitari berrientzako inspirazio-gunea da hori. Ahalegin partekatu horri esker, pandemia gogor baten ondoren turismoa berreskuratzea lortu dugu, eta 2022an susperraldian lider bihurtu gara.Eta 2023ko lehen 8 hilabete hauetan nazioarteko turismoan % 17 haztea lortu genuen, turismo nazionalaren askoz gainetik; izan ere, fokua turismoarengan jarri baikenuen”.
Hori dela eta, kazetaritza-lana nabarmendu nahi izan du, “oso garrantzitsuak zaretelako Euskadin enpleguaren % 11 hartzen duen turismo-industriarentzat, industria horretan 107.000 familia baino gehiago baitaude lanean”.
Sarituak
Alicia García Arribas 2009 ezkero nazioarteko zinema eta telesailetan espezializatutako kazetaria da EFE agentziarentzat. 1989an hasi zen bertan lanean.Kulturaren munduan sartu zenetik —politikatik bertara jauzia egin zuenetik—, Donostiako Zinemaldiarekin guztiz maitemindu zen, eta urte hauetan guztietan ez du hutsik egin bertara. Informatzaile gisa egin du lan, mundu osoko komunikabideetan zabaldu diren ehunka elkarrizketen bidez. Feroz sarietan parte hartzen du, eta sari horien Batzordeko kide da AICE (Espainiako Zinema Informatzaileen Elkartea) sortu zenetik. Batzorde horretako bazkide ere bada.
Alfonso Riverak lehen aldiz bisitatu zuen Donostiako Zinemaldia Bette Davis handia etorri zen urte berean.Harrezkero, edozein zinema-kazetarirentzat ezinbestekoa den zita honetara ez da falta izan.Madrilgo Complutense Unibertsitatean Kazetaritzan lizentziatua eta New York Film Academy-n zuzendaritzan diplomaduna, duela hamar urte baino gehiagotik Cineuropa webguneko Espainiako korrespontsal gisa lan egin du. Bilbon egoitza duen “Aux magazine”rentzat ere idazten du, eta El País Semanal, ABC, Marie Claire, Ver Tele, Fantastic Magazine, Castilla La Mancha Televisión, Canal TCM, Radio 3 eta Fotogramas hedabideetan kolaboratu du, besteak beste. Vigor dokumentala zuzendu, idatzi eta ekoitzi du, DocumentaMadrid-eko hautaketa-taldeko kidea izan zen, eta epaimahaiko kide izan zen La Habana, Abycine, Málaga edo Medina del Campo zinemaldietan. Horrez gain, kritika zinematografikoko lantegiak eman zituen Bogoshorts-en (Kolonbia) eta Sevillako, Les Arcs-eko (Frantzia) eta Trieste-ko (Italia) Europako Zinemaldian.
