- Berdintasun, Justizia eta Gizarte Politiketako sailburua Europako Adiskidetasuneko Jardunbide Egokien VII. Jardunaldian izan da
- Adinekoen zahartze aktiboa sustatzen duten esperientziak ezagutaraztea eta partekatzea da helburua
- “Adina ez da, ezta izan behar ere, gizartean parte hartzeko faktore mugatzailea. Zahartzea bizitzaren beste etapa bat da, eta, beraz, aukera, ikaskuntza eta bizipenez beterik egon behar du”, esan du sailburuak
Berdintasun, Justizia eta Gizarte Politiketarako sailburu Nerea Melgosak, Bilboko alkate Juan María Aburtorekin batera, Adiskidetasuneko Europako Jardunbide Egokien VII. Jardunaldia inauguratu du gaur goizean, Lagunkoia 2023 Gizartearen parte-hartzea eta herritar aktiboak erronkari begira.
Hitzaldian, adineko pertsonei erantzukizun eta protagonismo handiagoa emateko beharra nabarmendu du Melgosa sailburuak. “Funtsezkoa da adineko pertsonak aldaketa-eragile bihurtzea, esperientziarekin, jakinduriarekin eta gaitasunekin, guztion onurarako bideratu ahal eta behar direnak”, esan du.
Melgosak zahartze aktiboaren alde Eusko Jaurlaritzak garatzen dituen estrategiak azaldu ditu, hala nola Adinekoekiko Gobernantzaren Euskal Estrategia, 2019an abian jarri zena, edo Adinekoekiko Euskal Estrategia, 2021ean abian jarri zena.
“Bi ekimenek aurre egin behar diete zahartzen ari den biztanleriak dakartzan erronkei, adinekoen parte-hartze aktiboa bultzatzen dute bizitza publikoan, pertsona horiek gizarte- eta politika-erabakietan kontuan hartuko direla bermatzen dute, zahartze aktiboa, osasungarria eta parte-hartzailea sustatzen dute, eta guztientzako bizitza oso eta egokia bermatzen dute”, esan du sailburuak.
“Agenda Nagusiarekin adinekoen eta Eusko Jaurlaritzaren gune bat sortzen dugu, eragiten diguten arazoei aurre egiteko irtenbide onenak definitu eta diseinatzeko, eta, aldi berean, gure agenda politikoaren zati dira”, azaldu du.
Era berean, Nerea Melgosak Eusko Jaurlaritzak bultzatutako beste ekimen batzuk gogoratu ditu, hala nola, Hariak, nahi ez den bakardadearen aurka borrokatzeko; Zaintel (900 100 356), familia zaintzaileei laguntzeko telefonoa; edo Zaintzako Tokiko Ekosistemak, “dagoeneko 14 euskal udalerritan abian jarriak, zainketa-eredu pertsonalizatu eta komunitarioarekin, pertsona bakoitzaren behar eta lehentasunetatik abiatuta”.
Nerea Melgosak erantzukizun publikoa azpimarratu du “adineko pertsonen errealitate berriari erantzuteko politikak, sistemak eta jarrerak egokitzeko”, eta gogorarazi du “adineko pertsonekiko adeitasuna erantzukizun partekatua dela”.
Bestalde, Juan María Aburto Bilboko alkateak adierazi duenez, “erakundeak behartuta gaude pertsonen bizi-kalitatea duina, aktiboa, osoa eta abar bermatzeko proiektu berrietan pentsatzera, baita zahartu ahala ere. Bilbon, adinekoen parte-hartze osoa bultzatzeko erronka hartu dugu, haien beharrak, interesak eta itxaropenak kontuan hartuta”.
Melgosa sailburuak Euskadi Lagunkoiaren lanari balioa emanez amaitu du bere hitzaldia, Eusko Jaurlaritzaren eta Matia Institutuaren arteko sinergiatik sortu baitzen. “Argi dago lankidetza publiko pribatuak ekimen berriak sor ditzakeela, hala nola gaur aurkeztuko direnak, eta gero eta lagunkoiagoa den Euskadi eraikitzen laguntzen digute”.
Melgosa sailburuak Eusko Jaurlaritzaren eta Matia Institutuaren arteko sinergiatik sortutako Euskadi Lagunkoiaren lanari balioa emanez amaitu du hitzaldia. “Lankidetza publiko-pribatuak gaur aurkeztuko diren bezalako ekimen berriak nola sor ditzakeen erakusten duen adibide argia da, eta gero eta lagunkoiagoa den Euskadi eraikitzen jarraitzen laguntzen digute”.
