- Osasun Sailak gaixotasun neurodegeneratiboak eta neuromuskularrak dituzten pertsonei arreta emateko estrategia bat garatu du
Gotzone Sagardui Osasuneko sailburuak Gaixotasun arraroei eta Europako erreferentziazko sareei buruzko “nola bermatu Europaren elkartasuna pazienteentzat?” konferentziaren irekieran parte hartu du gaur Bilboko Euskalduna Jauregian. Inaugurazio-ekitaldian izan dira, besteak beste, Juan Mari Aburto Bilboko alkatea, Stella Kyriakides Elikagaien Osasun eta Segurtasuneko Europako komisarioa, Sandra Gallina Europako Batzordeko Elikagaien Osasun eta Segurtasuneko zuzendari nagusia, José Manuel Miñones Conde Espainiako Gobernuko Osasun ministroa eta Oliver Röpke Europako Ekonomia eta Gizarte Batzordeko presidente.
Hitzaldian, sailburuak arlo horretan orain artean egindako lana azpimarratu du. «2012an, Euskadiko Gaixotasun Arraroen Aholku Batzordea abian jarri genuen; harrezkero, lanean ari gara pazienteen diagnostikoa, tratamendua eta jarraipena hobetzeko, eta, 2013tik, EAEko Gaixotasun Arraroen Erregistroa dugu. Orain arte 10.427 kasu identifikatu dira», adierazi du.
Datuen atzean pertsonak daude, horregatik Sagarduik azpimarratu du, «ikerketara, tratamenduetara eta zainketetara bideratu behar ditugu gure indarrak eta baliabideak, datu horien atzean dauden pertsonei arreta integrala eskaintzeko”.
Horregatik, gaixotasun arraroen lan-ildoa funtsezkoa eta lehentasunezkoa da Osasun Sailaren Esparru Estrategikoan eta Euskadi 2030 Osasun Planean. Horren harira, Osasun Sailak gaixotasun neurodegeneratiboak eta neuromuskularrak dituzten pertsonei arreta emateko estrategia bat ere garatu du.
“Zinez sinesten dugu gaixotasun arraroen inguruko ikerketan, tratamenduetan eta ulermenean aurrerapausoak eman behar ditugula arreta eta laguntza integrala eskaintzeko, gaixotasun arraroak artatzen eta ikertzen jarraitzeko eta aurrerapausoak emateko dugun konpromiso irmoa baita” esanez amaitu du sailburuak.
