Nerea Melgosa Eusko Jaurlaritzako Berdintasun, Justizia eta Gizarte Politiketako Sailburuak Vitoria-Gasteizen parte hartu du Goalball-en kirol-topaketan, ikusteko desgaitasunaren inguruan sentsibilizatzeko programaren barruan.
Goalball pertsona itsuentzat edo ikusteko urritasuna duten pertsonentzat bereziki sortu den kirol paralinpiko bakarra da. Jokoa, nagusiki, entzumenean oinarritzen da, barruan kaskabiloak dituen pilotaren ibilbidea antzemateko. Kirol horretarako, espazio-orientaziorako gaitasun handia behar da baloia antzemateko, zelaian estrategikoki kokatzeko eta jaurtiketa egiteko. Ikasleek karatula opakuak daramatzate, parte-hartzaileen ikuspen-falta parekatzeko.
Jarduera horren bidez, ikasleak ikusteko desgaitasunaren mundura hurbiltzen dira, pertsona itsuen edo ikusmen urrikoen munduaren ikuspegi praktiko eta erreal batekin. Kolektibo horrek haren egunerokotasunean dituen zailtasunak ezagutuko ditu, desgaitasun-egoerekiko jarrera enpatiko bat garatzeko.
Jarduera bi zatitan garatzen da: bat, teorikoa, non ikusteko desgaitasunari, ikusmen urria duten pertsonentzako laguntzei, Goalballen oinarrizko nozioei eta ikasleentzako entzunezko eta ikusizko material erakargarriaren eta ikusteko desgaitasunari lotutako sintomak simulatzeko betaurrekoen bidez ikusizko higiene onerako aholkuei buruzko informazioa ematen baita. Eta bestea, alde praktikoa, non sei pertsona txandakatu egiten baitira Goalballen kirola egiteko.
Ekitaldia Itxaropena elkarteak antolatzen du; elkartea irabazi-asmorik gabekoa da. 1980an sortu zuen guraso-talde batek, haien seme-alaba txikiek, ikusteko arazo larriak zituztenek, ONCEk Madrilen, Alacanten edo Valentzian zituen ikastetxe berezietara ikastera joan beharrik izan ez zezaten.
Itxaropenak ikusteko desgaitasun larria duten pertsonen integrazioa sustatzen du familia-, gizarte-, eskola- eta lan-mailan, eta ikusteko desgaitasuna duten pertsonen familiei edo haren eraginpean dauden pertsona indibidualei ematen die arreta.
Itxaropena erreferente gisa proposatzen da Araban, ikusteko % 33tik gorako desgaitasuna duten pertsona guztiek laguntzarako dituzten beharrei erantzun ahal izateko, haien bizitza eta gizarte-integrazioa hobeak izan daitezen.
