Clara Campoamorrek «3Ko Hamaikakoa» kontzertua hartuko du azaroaren 29an, Hala Dziporen eskutik, Kortatu, Zarama, Jotaike, Hertzainak eta beste hainbat talderen moldaketekin. Sarrera librea eta erabat doakoa da Barakaldo Antzokiak «Lo nengoela» hartuko du abenduaren 3an, Fran Lasuen musikari polifazetikoaren abestiekin. Doako gonbidapenak azaroaren 28tik aurrera jaso ahal izango dira Barakaldo Antzokian
Datorren abenduaren 3an Euskararen Eguna ospatuko da, eta Barakaldoko Udalak Hala Dzipo musika eskola ere izango du. Horrela, euskal artistak omenduko dituzten doako bi ikuskizun sortu dira: Hamaikakoa, helduentzat, eta Lo Nengoela, publiko guztientzat. «Euskararen Egunaren ospakizuna jai bat izatea nahi dugu eta horregatik urteak daramatzagu Hala Dziporekin elkarlanean barakaldarrei euskal kulturaz gozatzeko aukera eskaintzeko, euskara protagonista izango den bi arratsaldetan», adierazi du Iratxe Foces Hala Dzipoko Eider Zanarruzabeitiarekin batera Euskara zinegotziak.
Lehenengo ikuskizuna azaroaren 29an izango da, Clara Campoamorren. 3ko Hamaikakoa helduei zuzenduta dago, eta Barakaldoko gune kultural hau 80ko hamarkada gogora ekartzeko kontzertu-areto bihurtuko du, gehien entzuten ziren talde euskaldunekin: Hertzainak, Kortatu, Jotake, Delirium Tremens… «Punk eta rock estilotik folk generora aldatu ditugu talde hauen abestiak», azaldu du Zenarruzabeitiak. Ikuskizuna 19: 30etan hasiko da eta sarrera librea eta doakoa izango da lekua bete arte.
Bestalde, abenduaren 3an bertan, Barakaldo Antzokiak Lo nengoela ikusteko oihala igoko du, Hala Dzipok idazle baten sormen prozesua publikoari hurbiltzen dion familia ikuskizuna. Horretarako, Fran Lasuen musikari polifazetikoaren abestiak bildu dira eta helduei zein txikiei gustatuko zaien istorio polit bat eskainiko dute. Ikuskizunean Bikariko erraldoiek eta Ibarra-Kaldu taldeak, Sandra Fernandez aktoreak eta Hala Dzipo musika eskolako ikasle txikiek ere parte hartzen dute.
Ikuskizun hau ikusteko doako gonbidapenak datorren asteartean, azaroaren 28an, jaso ahal izango dira antzokiko leihatiletan.
