Jardunaldia datorren larunbatean, azaroaren 25ean, izango da Barakaldoko Clara Campoamor Zentro Zibikoa, 10: 00etatik 14: 00etara
Emakumeen aurkako Indarkeria Ezabatzeko Nazioarteko Egunarekin bat eginez, Barakaldo-Sestao ESIak Sexu-indarkeriaren aurkako I. Jardunaldia antolatu du Barakaldoko Clara Campoamor Zentro Zibikoan.
Lehen jardunaldi hau Barakaldo-Sestao ESIak Arreta Komunitarioan lantzen dituen hezkuntza afektibo-sexualeko ekintzen esparruan ulertu behar da. Barakaldo-Sestao ESIko Berdintasun Batzordeak antolatutako jardunaldiaren helburu nagusia da, herritarrak eta profesionalak sentsibilizatzen jarraitzea hezkuntza afektibo-sexuala egokia emateak duen garrantziari buruz. Izan ere, emakumeen aurkako indarkeria prebenitzeak lotura estua du gazteen kalitatezko sexu-hezkuntzarekin.
Karmele Iglesia Rosende Barakaldo-Sestao ESIko Pertsonen zuzendariak eta Artemiss Torres Fernandez Berdintasun Erreferenteak inauguratuko dute jardunaldia. Goizean zehar, gaia ikuspegi pluraletik jorratuko duten hainbat arlotako hizlari erreferenteek hartuko dute parte.
HEZKUNTZA AFEKTIBO-SEXUALA IKASTETXEETAN
Barakaldo-Sestao ESIak hezkuntza afektibo-sexuala aktiboki sustatzen du ikastetxeetan 2019az geroztik, bi ikastetxetan proiektuaren pilotaje bat egin zenetik, gainerakoetara zabaltzeko asmoz. Ekimenak bertan behera utzi behar izan zen pandemia garaian, eta iaz 160 ikasle baino gehiago trebatu ziren.
Ekimenak arrakasta izan duenez, 2024rako Lehen Hezkuntzako seigarren mailako ikasleei zuzendutako beste deialdi bat dago programatuta. Orain arte, Barakaldoko eta Sestaoko lehen hezkuntzako 14 ikastetxeri prestakuntza ematea planifikatuta dago, eta horrek hezkuntza afektibo-sexualean 700 ikasle inguru prestatzea ekarriko du.
