Adierazpenaren helburua da Europako herrialdeetan hezkuntza globala sustatzeko erreferentzia esparrua izatea.
eLankidetza-Garapenerako Lankidetzaren Euskal Agentziak, Berdintasun, Justizia eta Gizarte Politiketako sailean dagoena, eta Euskal Fondoak 2050 Hezkuntza Globalari buruzko Europako Adierazpena aurkeztu du, Dublingo Adierazpena izenarekin ezaguna. Bertan, GENE Hezkuntza Globalaren Europako Sareko, Platformako eta garapenerako Nazioarteko Lankidetzaren Espainiako Agentziako kideek parte hartu dute.
2022ko azaroan, GENEk, Europar Batasuneko kide diren herrialdeetako ministerioek eta agentziak biltzen dituenak eta Europako Batzordearekin lan egiten duenak, Europako herrialdeetan gizarte-eraldaketarako hezkuntza sustatzeko esparru dokumentua aurkeztu zuen.
Hezkuntza globala Euskadin
Hezkuntza sistemak aldatzen ari dira, ikasleei mundu konplexu bat aztertzeko beharrezko ezagutzak eta baliabideak emateko. Era berean, gero eta gehiago dira gizarte eraldaketarako hezkuntza edo hezkuntza globala premiatzat hartzen duten Europako herrialdeak. Hezkuntza horrek berekin dakar pertsona guztientzat giza eskubideak, inklusioa eta bizitza duina errespetatzea, eta hezkuntza ekimen mota guztiak hartzen ditu barne, bai formala eta baita ez formala ere.
Hezkuntza globala sustatzeko beharren aurrean, GENEK partaidetza prozesu bat ireki zuen 2020an. Tokiko eta eskualdeko gobernuei kontsulta egiteko prozesuan, Basque Country-k, eLankidetza eta Euskal Fondoa barneratzen dituena, Platformako kide gisa parte hartu zuen. Erakunde hori nazioarteko elkartasunean lan egiten duten tokiko eta udal gobernuen koalizio paneuroparra da.
Zentzu horretan, Euskadin (H)ABIAN 2030 gizarte-eraldaketarako euskal estrategia dago. Estrategiak erakunde publikoak, GGKEak, gizarte mugimenduak eta ikastetxeak biltzen ditu. Guzti horiek konpromisoa dute giza eskubideetan eta berdintasunean oinarritutako gizartea eraikitzen laguntzeko hezkuntza jarduerak egiteko, esparru formalean zein informalean.
