Kontsumobidek hipoteka-gastuak erreklamatzeko epeak gogoratzearen garrantzia azpimarratu du. Kontsumoko Euskal Institutuak gomendatzen du banketxeen hipoteka-gastuen erreklamazioak urtarrilaren 22a baino lehen egitea. Gomendio hori 2024ko urtarrilaren 22an hipoteka sinatu zen banketxean erreklamazioak aurkezteko epemuga ezartzen duen interpretazio juridikoan oinarritzen da. Data hori kalkulatzeko, Auzitegi Gorenaren 2019ko urtarrilaren 23ko epaia eta erreklamazioak egiteko bost urteko legezko epea hartzen dira kontuan.
Erreklamazioa banketxeko Bezeroarentzako Arreta Zerbitzuari edo Bezeroaren Defendatzaileari zuzendu behar zaio, eta hark hilabeteko epean erantzun behar du, gehienez ere. Funtsezkoa da erreklamazioa zerbitzu espezifiko horren aurrean aurkeztea, bulego konbentzional batean aurkeztea ez aurkeztutzat jo baitaiteke. Kontsumobidek erreklamazio-eredu bat eskaintzen du esteka honetan.
Auzitegi Gorenak berretsitako hainbat epairen arabera, hipoteka-mailegua ematen duen banku-erakundeak bere gain hartu behar ditu gestoria-, tasazio- eta erregistro-gastu guztiak, bai eta notariotzako gastuen % 50 ere. Hipoteka-kredituko kontratuetako klausulak, gastu horiek maileguaren eskatzaileei egozten zizkietenak, deuseztzat jo zituzten epai horiek.
Klausula horiek baliogabetzeak hipoteka-maileguaren eskatzaileek gastu horiek itzultzeko eskatzeko aukera ireki zuen. Hainbat banketxek epaia onartu eta gastuak eurek ordaindu behar zituztela onartu arren, ez zituzten itzuli nahi izan, erreklamazio-epea amaitu zela argudiatuta.
Gastu horiek erreklamatzeko epea bost urtekoa da, baina galdera erabakigarria sortzen da: noiz hasten den kontatzen epe hori. Hasiera batean, epea hipoteka sinatzen zen unean hasten zela argudiatzen zuten bankuek, baina Europako auzitegiek jarrera hori baztertu zuten kontsumitzaileei defentsa-gabezia eragiteagatik. Bankuen jarrera horrek kontsumitzaileen eskubideak baliatzeko atea itxiko zuen, klausulen deuseztasuna deklaratu aurretik epea amaituta zegoela onartuko baitzuten.
Gaur egun, ez dago ziurtasun juridikorik epea jurisprudentzia ezartzen denetik (2019ko urtarrilaren 23a) edo klausula deuseztatzen denetik zenbatzen hasten den jakiteko. Nolanahi ere, gatazkak saihesteko, Kontsumobidek gomendatzen du hipoteka 2019ko urtarrilaren 15a baino lehen sinatu zutenek hipoteka-gastuak itzultzea erreklamatzea 2024ko urtarrilaren 22a baino lehen.
2019ko ekainaren 15a baino lehen hipotekak sinatu zituzten pertsonak dira hipoteka-gastuak erreklama ditzaketenak, ohikoa baitzen bankuek eskatzaileei egoztea. 2019ko ekainaren 16tik aurrera, Higiezinen Kreditu Kontratuak Arautzen dituen Legea indarrean sartu zenetik, hipoteka-gastuak banketxeei egoztea ezarri zen, eta, beraz, ez da bidezkoa data horren ondoren sinatutako hipoteken gastuak erreklamatzea.
