Eusko Jaurlaritza 5.000M €-ra iritsi da gaur zorpetze jasangarrian, «Euskadi Bonu Jasangarria» ren zortzigarren jaulkipenarekin, hamar urterako 600 milioi euroko balioarekin. Eskaria eskaintza baino ia zazpi aldiz handiagoa izan da (4.013m €-ko eskaerak jaso dira). Emisioa Paristik egin da, aste honetan garatutako road show-ean antzemandako inbertsio-gosea dela eta, egokiena iruditu baitzaio.
«Aukera-leiho garrantzitsu bat ikusi dugu; izan ere, Euskadik rating bikaina du, eta, horren ondorioz, merkaturatzea arrakastatsua da, eta gure posizionamenduak benetako interesa sortu du izandako bileretan», nabarmendu du Pedro Azpiazu Ekonomia eta Ogasuneko sailburuak, eta emaitza horrek, beste behin ere, Eusko Jaurlaritzaren kaudimena erakusten duela gaineratu du.
Norbolsa, BBVA, Banco Santander, Banco Sabadell, Caixabank, HSBC, ING eta Credit Agricole enpresek hartu dute parte jaulkipen honetan.
Eragiketa honek inbertitzaileen babes sendoa erakusten du, 10 urterako % 3,4ko kupoi finkoarekin. Gobernuak kanpo-merkatuan kokatzeko apustuarekin jarraituz, % 70 nazioarteko kontuetan kokatu da -Alemania, Austria, Italia, Frantzia, Portugal, Txekiar Errepublika, Holanda, Britainia Handia, Norvegia, Belgika, Danimarka, Finlandia, Grezia, Irlanda, Luxenburgo, Malta eta abarrekoetan-, estatuko inbertitzaileetan % 24 eta Euskadiko inbertitzaileetan % 6. Horrela, Eusko Jaurlaritzak bonu jasangarrien merkatuaren garapenean paper garrantzitsua betetzeko asmo sendoarekin jarraitzen du, eta Euskadiren ingurumen-, ekonomia- eta gizarte-erronkei aurre egiteko finantzaketa arduratsu eta eraginkorra sustatzeko.
Inbertitzaileen artean, Eusko Jaurlaritzak astelehen eta asteartean Erresuma Batuan, Frantzian eta Alemanian bilerak egin dituen hainbat inbertitzaile daude, baita Nomura finantza-erakunde japoniarra ere, 2023an Azpiazu sailburuak Japoniara egindako bisitan harekin bilerak egin ondoren.
Jaulkipen berri hau 2018ko maiatzean hasitako prozesu baten zortzigarrena da. 500 milioi euroko jaulkipenarekin hasi zen prozesua. Horretarako, Ekonomia eta Ogasun Sailak road show bat egin zuen Europako hainbat herrialdetan. Horri esker, eskaintza hirukoiztu egin zen (13 herrialde), eta jaulkipena nazioarteko inbertitzaileen % 65etan kokatu zen.
Betiere eskaintza baino eskari handiagoarekin, Euskadi Bonu Jasangarriaren bilakaera, jaulkipenen arabera, honako hau izan da:
- 2018: 500 M €
- 2019: 600 M €
- 2020: 500 M €
- 2020: 600 M €
- 2021: 1.000 M €
- 2022: 500 M €
- 2023: 700 M €
- 2024: 600 M €
