Josu Erkoreka lehenengo lehendakariorde eta Segurtasuneko sailburua buru dela inauguratu da gaur goizean Jokoaren Euskal Behatokiak antolatutako “Sare Sozialak eta Jokoa” jardunaldia. Ekitaldia otsailean urtero ospatzen den Joko Arduratsuaren Nazioarteko Egunaren esparruan antolatu da. Topaketan, Jordi Morales i Grasek, Soziologia Konputazionalean doktorea denak, Behatokiaren azken txostena aurkeztu du: “Euskal eremu publiko digitaleko jokoaren irudikapen sozialei buruzko azterlana”.
Jardunaldi berean, Antonio Rial Boubetak, Santiago de Compostelako Unibertsitateko Gizarte Psikologiako irakasleak, gazteei eta adikzio berriei buruzko txostena aurkeztu du: “Free to play, pay to win eta las loot boxes jokoetatik joko patologikora”. Jarraian, mahai-inguru batean eztabaidatu dute sare sozialetan jokoaren prebentzioa nola jorratu Idoia Axpe Ormaetxeak, ASAJER Errehabilitazioan diren Jokalarien Elkartekoak; Juan Manuel Machimbarrena Garagorrik, UPV/EHUko irakasle eta Psikologian doktoreak; eta Unai Garma Aranak, “A90grados. Apuesta por ti, no te la juegues” sare sozialetako kontukoak.
Jokoa buruz pertzepzio negatiboa Euskadin
Jokoaren Euskal Behatokiak eskatutako azterlanaren helburua Euskadiko eremu publiko digitaleko ausazko jokoen narratibak eta joerak aztertzea da. Horretarako, iturri gisa Twitter sare soziala (orain X) erabili da: ia 5 milioi argitalpen segmentatu eta aztertu dira 6 hilabetean.
Txostenaren ondorio nagusia da sarean ausazko jokoekin eta apustu-etxeekin lotuta argitaratzen diren diskurtso gehienak negatiboak eta oso negatiboak direla. Adikzio-arazoekin, pobretzearekin eta familietan duten eragin negatiboarekin lotuta daude. Argitalpen gehienetan, moralaren ikuspegitik gaitzesgarriak diren gaiekin lotuta daude. Aldi berean, azterlanak nabarmentzen du apustu-etxeen edo ausazko jokoen aldeko diskurtsorik ez dagoela Interneten, ezta sektoreko enpresen aldetik ere, eta profil baxua edo nulua dute. Enpresa horiek ekitaldiak eta zozketak sustatzeaz arduratzen dira, ausazko jokoen defentsari zuzenean heldu gabe. Ikuspegi positibo eta enfatikoarekin, gehiegizkoarekin, egiten dute, gazteak erakartzeko.
Loteria Nazionala
Salbuespen nabarmena Gabonetako Loteriak duen erantzun positiboa da, aldeko tratamendua baitu bai hedabideetan bai profil digital gehienetan. Hala ere, ikerketak Loteria Nazionala gaitzesten duten komunitate minoritario txiki batzuk azaleratzen ditu, ausazko jokoei buruzko narratiba negatibo orokorrarekin lotuz, eta komunikabideei albisteei ematen dieten tratamenduaren hipokresia leporatuz. Iritzi horiek gutxiagotan ematen dira, baina hedapen aipagarria dute.
Orokorrean, hautematen da Gabonetako Loteriaren salbuespenari buruzko iritzi kritiko horiek, gutxiago badira ere, hedapen aipagarria dutela, bereziki gamingari, kriptodibisei eta tradingari lotutako gazteentzako edukiak sortzen dituztenen artean.
