Kopako finalean garaipena lortuz gero, nahitaezko protokoloa ezarriko da Gabarrari Itsasadarrean zehar laguntzeko. Protokolo horrek ontzien antolamendu bat eta inskripzio-kuota aldakor bat barne hartzen ditu
Athletic Clubek 2024ko Kopako txapeldun izateko aukeraren aurrean, Gabarrako ontzi laguntzaileak inskribatzeko egin beharreko izapideek izena emateko epea finalera aurreratzea eskatu dute, hori baita behar den dokumentazioa berrikusteko eta ekitaldi jendetsua behar bezala antolatzeko behar den denbora izateko modu bakarra.
Segurtasun arrazoiengatik*, Athletic Clubek, Bilboko Portu Agintaritzak, Euskal Herriko Itsasertz Mugarteak eta Bilboko Itsas Kapitaintzak erabaki dute zuri-gorriek garaipena lortuz gero Gabarrarekin batera Bilboraino igo daitezkeen ontzien sarbidea mugatzea.
Halaber, Athletic Clubek kategoria eta blokeen arabera ibilbidea antolatzea erabaki du, eta itsasontziei izen-emate kuota aldakorra eskatzea. Aldez aurretik izena ematea derrigorrezkoa da, eta Gabarrarekin batera ibaian zehar nabigatu nahi duten ontzi guztiek, horien tipologia** edozein dela ere, nahitaez eman beharko dute izena honako epe honetan: gaurko egunetik apirilaren 2ko 18:00ak arte. Ontzi motei, eskatutako dokumentazioari eta inskripzio-kuota aldakorrari buruzko informazioa esteka honetan dago eskuragarri:
Kontzentrazio Nautikoa – Athleticen Gabarrarekin batera nabigatu
Eskariek ekitaldiaren segurtasuna bermatzen duten ontzien gehienezko kopurua gainditzen badute, Athletic Clubek zozketa bat egingo du apirilaren 8an, astelehenean, izena eman duten ontzien artean, eta zozketa horren emaitzen berri emango du egun berean. Izena emateko kuota apirilaren 9an (asteartea) ordaindu beharko da, 23:59ak baino lehen.
Athletic Club txapeldun bilakatuko balitz, Gabarraren igoera apirilaren 11n, ostegunean, izango litzateke, 16:30etik aurrera, Getxoko Abrako Itsas Klubaren instalazioetatik Bilboko Udaletxeko zubiraino.
