Nerea Melgosak, Eusko Jaurlaritzako Berdintasun, Justizia eta Gizarte Politiketako sailburuak, Frankismoaren Biktimak Oroitzeko eta Aitortzeko Eguna ospatzeko Gasteizko Udalak antolatutako ekitaldian parte hartu du gaur goizean. Postak eta Agirre Lehendakariaren kaleen arteko bidegurutzean, «Isiltasunean oihuka» eskulturaren ondoan, Arabako hainbat ordezkari instituzionalek loreak jarri eta minutu bateko isilunea egin dute 1936ko estatu-kolpearen ondoren exekutatu zituztenen omenez.
1936ko martxoaren 31n Azazetako mendatean, Lizarrarako errepidean, falanjista talde batek fusilatutako Teodoro Gonzalez de Zarate alkate gasteiztarra eta Emilio Mola jeneral kolpistaren aginduz atxilotutako beste hamabost lagun gogoratu ditu Melgosak.
«Heriotzak, indarkeriak, konfiskazioak eta mehatxuak ez ezi, gerra hartako hainbat egoeratan eta haren preludioetan gertatutakoak ere kondena daitezke. Iraganeko eta egungo indarkeria mota guztiak ere halakoxeak dira. Hori oso argi izan behar dute belaunaldi berriek gizarte solidario eta ireki baten definizioan» adierazi du Nerea Melgosak.
Sailburuak berretsi du «hil ziren pertsonei, haien senideei eta euskal gizarte osoari aitortza eta omenaldi maiteagoa» egin behar zaiela. Indarkeria-ekintza guztiak salatu behar dira. Indarkeriazko ekintzek mina, gorrotoa eta konfrontazioa besterik ez dakarte; egunero ikusten ari garen zerbait. Hori gerta ez dadin, Memoria Historikoaren Euskal Legea garatzen ari gara «.
