Euskariana euskal kulturari buruzko edukietara sartzeko atari digitala da eta Euskadiko Liburutegi Digitalak kudeatzen du. Euskariana euskal kultur ondarearekin zerikusia duen edozein eduki Interneten bilatzeko aukera ematen duen atari digitala da. Eusko Jaurlaritzaren, Arabako, Bizkaiko eta Gipuzkoako Foru Aldundien, Euskal Autonomia Erkidegoko udalen, unibertsitateen eta euskal kultura-ondarearen baliabide digitalizatuak kudeatzen dituzten erakunde pribatuen arteko lankidetza estuan eraikitako proiektua da, eta jatorrizko euskarriak liburuak, aldizkariak, kartelak, argazkiak, diskoak edo bestelako materiala dira.
Euskarianaren proiektuak orain dimentsio handiagoa izango du Europako Liburutegi Digitalean, Europeanan, sartzearekin batera. Izan ere, Europako Liburutegi Digitaleko Agregatzaileen Batzar Nagusian, martxoaren 18an, Euskariana Europeanako 43. Agregatzaile bezala onartu zuen. Foro hori domeinu- eta gai-agregatzaileen sare batek osatzen du, kultura-erakundeei laguntzen dieten datu-hornitzaileek, Europeanari datuak eta edukiak eman diezazkioten. 2023ko urrian, Eusko Jaurlaritzako Kultura eta Hizkuntza Politika Sailak datuak trukatzeko akordioa sinatu zuen Europako Liburutegi Digitala kudeatzen duen Europeana Fundazioarekin.
Europeanari baliabideak ematen dizkioten pertsona, erakunde eta entitate guztiek Datu Bazkide estatusa jasotzen dute. Hemendik aurrera, Euskarianako bazkideek, gaur egun 71 bat, hainbat motatakoak (artxiboak, liburutegiak, museoak, foru aldundiak, udalak, fundazioak, elkarteak, enpresak, kultura-zentroak, etab.), nahi izanez gero, Euskarianaren kudeatzaile den Euskadiko Liburutegi Digitaleko Zerbitzuari baliabideak Europeanara gehitzeko eskatu ahal izango diote.
Europeanak 2600 hornitzaile baino gehiagoko Europako artxibo, museo, liburutegi eta ikus-entzunezko bildumen milioika baliabide digitaletarako sarbidea ematen du. Euskariana Europako Liburutegi Digitalean sartzen denean, euskal kultura-ondarea Europeanako edozein erabiltzailerentzat egongo da eskuragarri.
