- Basque Circular Summit-en edizio berria Bilboko Euskalduna Jauregian izango da datorren urteko apirilaren 2, 3 eta 4an
- Ihobe sozietate publikoak 2022an antolatutako aurreko edizioan kontinente osoko industria eta ingurumen arloko 800 profesional eta espezialista baino gehiago bildu ziren, eredu zirkular baterako trantsizioak Europar Batasunean izaten ari dituen ondorioak aztertzeko
- Ekitaldia ekonomia zirkularrak enpresei eta Euskadiko ehun sozioekonomiko osoari eskaintzen dizkien erronkak eta aukerak aztertzeko tokia izango da, eta dagoeneko egin den lanaren balioa azpimarratuko du ere, jarduera berrietarako inspirazio-iturri gisa
Basque Circular Summit, Europako hegoaldeko ekonomia zirkularrari buruzko ekitaldirik handiena, datorren urtean berriro egingo da. 2025eko apirilaren 2an, 3an eta 4an izango da, Bilboko Euskalduna Jauregian, eta kontinente osoko industria eta ingurumen arloko profesionalak eta espezialistak bilduko dira bertan, eredu zirkular baterako trantsizioak Europar Batasunean izaten ari dituen ondorioak aztertzeko.
Ekitaldia Ihobe Eusko Jaurlaritzaren Ingurumen Jarduketarako Sozietate Publikoak antolatuko du, ekonomia zirkularrak enpresei eta Euskadiko sare sozioekonomiko osoari eskaintzen dizkien erronkak eta aukerak aztertzeko, eta, dagoeneko egindako lanaren balioa azpimarratuz, jarduera berriak bultzatzeko. Gainera, eredu ekonomiko berri horrek eskaintzen dituen negozio aukerak eta lehiakortasuna hobetzeko aukerak eztabaidatzeko leku egokia izango da hara joaten direnentzat.
Basque Circular Summit-en edizio berriak Eusko Jaurlaritzak ekonomia zirkularreko eredu berri baterako beharrezko trantsizio horretan enpresei eta eragile sozioekonomiko guztiei laguntzeko duen konpromisoa erakusteko balioko du. Legeetan eta arauetan egindako aurrerapenak ere aztertuko dira, eta baita azken urteotan Europako Itun Berdearen esparruan ekonomia zirkularrean egin diren berrikuntzak ere.
Euskal enpresek dagoeneko aldaketak egiten ari dira, eta, beraz, ekonomia zirkularrean haiek egin duten lana eta lortu dituzten emaitzak partekatu ahal izango dituzte Basque Circular Summit-en, bai bakarka, bai Euskadiko Ekonomia Zirkularreko Estrategia 2030 esparruan martxan jarritako lankidetza publiko eta pribatuko ekimenen bidez: Basque Ecodesign Center, Euskadiko ETE Zirkularra eta Basque Ecoinnovation. Gainera, ekitaldiak nazioartean izango duen oihartzunari esker, Euskadi ekonomia zirkularraren printzipioak aplikatzen dituen lehenetariko lurralde gisa ezagutuko dute nazioartean.
Zirkulartasunaren aldeko apustua sustatzen jarraitzeko, topaketan ekintzarako irizpide eta giltzarriak emango dizkie euskal enpresei, erakunde publiko eta toki-erakundeei, akademikoei eta baita herritarrei ere.
2022ko arrakastaren ondorengo edizio berria
Basque Circular Summit-en aurreko edizioa 2022ko azaroan egin zen Ficoban (Irun), SPRI Taldearen laguntzarekin. Han, 800 profesional eta hainbat industria-sektoretako 350 enpresa baino gehiago bildu ziren, negozio-eredu jasangarriagoak eta lehiakorragoak ezagutzeko.
Ekitaldiaren ardatza enpresa-sarea izan zen, eta haren ondoren, Euskadi Europako erreferentzia bihurtu zen ekonomia zirkularraren arloan. Europako Batzordeko ordezkariek, CIE Automotive, Eroski, Siemens Gamesa, Petronor, Orona, Sidenor, Vicinay Cadenas, Iberdrola, Uvesco eta Kutxabank bezalako euskal enpresa handiek, hainbat klusterrek, zentro teknologikoek eta unibertsitateek hartu zuten parte.
Datorren urtean, Basque Circular Summit-ek ekonomia zirkularreko eta ekodiseinuko azken berrikuntzak Euskadira ekarriko ditu, euskal enpresak Europako erreferente izaten jarrai dezaten eta euskal industria etorkizun zirkularrago baterako prestatuta egon dadin.
