Lehen hiruhilekoan eraikuntzaren sektorean izandako jardueraren igoerak hasiera ematen dio gaur Astekonomiari. Laburpen honek asteko adierazle ekonomiko garrantzitsuenak jasotzen ditu, etxebizitzaren prezioaren igoerari ere erreparatuta —handitzen jarraitzen baitu—, Estatuko maiatzeko KPIarekin batera.
Alde batetik, 2024ko lehen hiruhilekoan, Euskadiko eraikuntzaren sektoreko jarduera % 5,2 hazi zen aurreko urteko aldi beraren aldean. Bilakaera hori eraikuntzan (% 5,7) eta obra zibilean (% 2,1) izandako gorakadak eragin zuen. Aitzitik, enpleguak % 0,3ko jaitsiera apala izan zuen.
Bestalde, etxebizitzaren prezioa % 1,4 igo zen 2024ko lehen hiruhilekoan aurreko urteko aldi beraren aldean. Hala, Etxebizitza Ministerioaren datuen arabera, pandemiaren aldian izandako jaitsiera salbuetsita, etxeen balioak handitzen jarraitzen du 2018tik. Hala ere, 2008ko krisiaren urteetan lortutako balioetara iristeko tartea badago oraindik.
Orobat, INEk aurreratutako adierazlearen arabera, maiatzean KPIa % 3,6koa izan zen, apirilean erregistratutako tasaren hiru hamarren gainetik. Bilakaera hori eragin zuen elektrizitatearen prezioek izandako igoerak, 2023ko maiatzean izandako jaitsieraren aldean. Halaber, azpiko inflazioa % 2,9tik % 3,0ra igo zen, eta, horrela, 2023ko abuztuan hasitako beheranzko bideari utzi zion.
Asteroko laburpen hau minutu bateko iraupeneko bideo hauen oinarria da, eta gaurkotasun ekonomikoaren hedapena eta jarraipena erraztea du helburu.
