- Joan den denboraldian ikusitakoa kontuan hartuta, denboraldi honetan, klima-aldaketarekin lotutako inpaktuen jarraipen berezia egingo da, besteak beste karabela portugaldarren eta marmoken agerraldia eta mikroalgen ugaritzea (Ostreopsia)
- Astero laginak jasoko dira 43 bainu-guneen analisi mikrobiologikorako, eta hondartzaren ingurunearen egoera baloratuko da, zerbitzuei eta garbiketari dagokienez
Hasi da bainu-denboraldi ofiziala Euskadin, eskatutako kalitate-estandarrak betez. Euskadin, 38 bainu-gune daude kostaldean, eta 5 Uribarri Ganboako urtegian. Eusko Jaurlaritzako Osasun Sailak egindako zaintzaren arabera, 40 bainu-gunek kalitate bikaina edo ona dute.
Bainu-denboraldian, Osasun Sailak astero aztertzen ditu 43 bainu-guneetako analisi mikrobiologikorako laginak, eta horietako bakoitzaren uraren kalitateari buruzko informazioa ematen du. Euskadiko hondartzen egoera sanitarioari buruzko informazioa Osasun Sailaren webgunean aurki daiteke.
Bainu-denboraldian zehar, uraren kalitatearen aldaketa puntualak gerta daitezke, gehienbat euri-jasa handien ondorioz, eta horrek aldaketak eragin ditzake bainurako gomendio sanitarioan. Beste denboraldi batzuetan bezala, gorabehera horien jarraipen espezifikoa egingo da, eta herritarrak eta kudeatzaileak jakinaren gainean egongo dira.
Gertakari horiek ikertzeko eta urak zaintzeko jarduerak babesteko, koordinazioa dago URA-Uraren Euskal Agentziarekin, 2023an sinatutako lankidetza-hitzarmenean jasotakoaren arabera. Halaber, lankidetza estua dago Donostiako Udalarekin, kostaldeko beste udalerri batzuekin, Foru Aldundiekin eta hornidura eta saneamendua kudeatzen duten erakundeekin (partzuergoak).
Aurten, Ostreopsis mikroalgaren espezie batzuen presentziari lotutako sintomen agerraldia zainduko da bainularien artean. Gaur egun, Ostreobila proiektua gauzatzen ari da, GIS Litorale de la Communauté d’Agglomération Pays Basque erakundeak koordinatuta, interes zientifikoko mugaz gaindiko elkartea, euskal kostaldeko lurralde-erakundeak eta erakunde zientifikoak biltzen dituena. Proiektu horretan Gipuzkoako Foru Aldundiak, Donostiako Udalak, AZTIk eta UPV/EHUk ere parte hartzen dute, eta uretan Ostreopsis spp mikroalgaren presentzia, banaketa eta euskal kostaldeko hondartzetan ugaritzea errazten duten baldintzak zainduko dira.
Bestalde, kostaldean karabela portugaldarrak eta marmokak ager daitezkeenez, 2023an gertatu zen bezala, Euskadiko larrialdiak koordinatzeko sistemaren barruan jarduteko protokoloa berrikusi eta eguneratu da, AZTIko langileekin eta salbamendu- eta sorospen-erakundeekin batera.
Era berean, 2023. urteaz geroztik, bainu-gune kontinentalen zaintzan mikrozistinen analisia sartzen da, Uribarri Ganboa urtegiko ur kontinentaletako zianobakterioen bilakaeraren adierazle gisa.
Bestalde, Kerik Gabeko Guneak ekimenaren barruan, Euskadiko 21 hondartza kerik gabeko hondartzak izango dira aurten. Hondartza horietan ez erretzea eta ez lurruntzea gomendatzen da. Kerik gabeko gune horien helburua da biztanle guztiak tabako-ketik babestea eta gure herri eta hirietan ingurune garbi eta osasungarriak sortzea eta mantentzea. Ekimen honekin ingurumena babestea ere bilatzen da, gogoratu behar da zigarrokinak ingurumenaren kutsatzaile handienetako bat direla.
Gainera, udan zehar, Osasun Sailak bereziki azpimarratuko ditu beroaren arriskuak prebenitzeko gomendioak eta aholkuak, batez ere tenperatura altuen aurrean, eta pertsona ahulenei zuzenduko zaie batez ere (adinekoak, haurrak, gaixoak edo kirola egiten duten herritarrak).
