Erdilari gasteiztarrak laugarren denboraldia beteko du Lezaman, eta 25 partida jokatu ditu aurten
Itxaso Uriartek Athletic Cluben jarraituko du futbolariaren kontratua denboraldi baterako luzatu ostean. Gainera, helburuen arabera beste bat izateko aukera dago. Gasteizko erdilariak 25 partida jokatu ditu denboraldi honetan, 18 titular gisa, eta 79 partida ofizial jokatu ditu 2021eko udan iritsi zenetik.
Gasteiztarra ezinbesteko zutabea izan zen David Aznarrentzat denboraldi hasieran, apirilean ebakuntza egin zioten arte, eskuin belaunean meniskopatia zuelako, eta datorren denboraldirako prest egongo da. Itxaso Gasteizko Aurreran hezi zen, eta handik Realera igaro zen, eta hamarkada bat bete zuen bertan Athletic Clubera etorri aurretik. Arabako lehoia Lehen Mailan eskarmentu gehien duen jokalarietako bat da, eta funtsezko oreka ematen jarraitzen du zuri-gorrien zelai erdian.
Jon Uriarte, Athletic Clubeko presidentea, eta Xabi Arrieta, Emakumezkoen Futboleko kirol zuzendaria, Ibaigane Jauregian egindako ekitaldian izan dira. Itxaso pozik agertu da Klub zuri-gorrian bere ibilbidea luzatu ahal izateagatik: «Sentsazio oso onak izan ditut berdegunean, gero eta minutu gehiagorekin eta protagonismo handiagoarekin. Jokalari hobea sentitzen naiz».
