- Ekitaldia Eusko Legebiltzarrean burutu da, bertako presidente Barkartxo Tejeriaren, Jokin Bildarratz Hezkuntza sailburuaren eta Juan Ignacio Perez Iglesias Jakiundeko presidentearen parte-hartzearekin
- 2023-2024 ikasturte honetan, DBH 4. mailako 273 ikaslek hartu dute parte Jakiundek antolatzen duen hitzaldi zikloan
- Programaren xedea da gazteen ezagutza zabaltzea eta haien jakin-mina piztea, ezezagun zaiena bilatzeko interesa sortaraziz ikasleengan
Jokin Bildarratz Hezkuntza sailburuak eta Bakartxo Tejeria Eusko Legebiltzarreko presidenteak Arabako Jakin-mina hitzaldi zikloaren amaiera ekitaldian parte hartu dute gaur goizean. Jakiunde Zientzia, Arte eta Letren Akademiak antolatzen du ziklo hau, DBHko 4. mailako ikasleei zuzenduta. Legebiltzarraren egoitzan burutu den ekitaldian Jakiundeko presidente Juan Ignacio Perez Iglesias ere parte-hartzaile izan da.
Ekitaldian, aurten hitzaldietan parte hartu duten ikasle arabarrek euren ziurtagiriak jaso dituzte. 2023-2024 ikasturtean Jakin-mina zikloak 35 hitzaldi eskaini ditu guztira, eta DBHko 4. mailako 273 ikasle izan dira horietan, hiru lurralde historikoetako 41 ikastetxetakoak. Ohikoa denez, hitzaldiak Bilbon, Gasteizen, Donostian eta Arrasaten eman dira, 2023ko azarotik 2024ko martxora bitartean, euskaraz, gaztelaniaz zein ingelesez.
Legebiltzarreko presidentearen ahotik, ikasleek ezagutu ahal izan dute Legebiltzarrak –erakunde legegile gisa- Euskadiko erakunde-arkitekturan dituen funtzio eta eginkizunak zeintzuk diren, zein organok osatzen duten erakundea edo ganbera nola osatzen den hauteskundeak egin ondoren. Jokin Bildarratz sailburuak, bestetik, ikasleak zoriontzeaz gain, Jaurlaritzaren eginkizuna, honek Legebiltzarrarekin duen harremana eta botere exekutiboari dagozkion eskuduntzak eta betebeharrak azaldu dizkie neska-mutilei.
Ziurtagiriak jaso ondoren, ikasle gazteek bisita gidatua egin dute Legebiltzarraren egoitzan.
Jakin-mina
Jakiundek antolatuta, DBHko 4. mailako ikasleei zuzenduriko hitzaldi zikloa da Jakin-mina, hainbat diziplina eta gaitan ezagutza zabaldu asmoz. Ekimen honek aukera paregabea ematen die parte hartzen duten ikasle gazteei, azken berrikuntzak bertatik bertara ezagutu ditzaten, bai ikerketan, bai hainbat arlotako egungo joeretan. Hitzaldiak beren jakintza-arloetako aditu ezagunek ematen dituzte.
Jakin-minaren bidez, ikasleak harremanetan jartzen dira errealitate zientifikoarekin (hitzaren zentzurik zabalenean, natura eta gizarte-zientziak barne), artistikoarekin eta literarioarekin, eta hezkuntza-sistemak ikuspegi estandarizatu batetik hurbiltzen dizkien gaietan sakontzeko modua izaten dute, edo curriculum-edukietan ohikoak ez diren gaietara gerturatzekoa.
Programa honek akademikoki motibatutako gazteen garapen intelektual eta pertsonala sustatu nahi du, lehen mailako adituek emandako hitzaldi eta erakustaldien diziplina anitzeko programa baten bidez. Jarduera honen bidez, Jakiundek gazte horien ezagutza zabaldu nahi du, eta haien jakin-mina piztu, ezezagun zaiena bilatzeko interesa sortaraziz.
Aintzinako Greziatik adimen artifizialera
Aurten Jakin-mina zikloan parte hartu duten Arabako ikasleek aintzinako Greziatik –EHUko Antzinako Historiako ohorezko irakasle Ana Iriartek emandako hitzaldiarekin– gaur egunera arteko bidaia egin ahal izan dute, adimen artifizial sortzailearen ezarpenarekin bizi garen mundua nola ari den aldatzen ezagutzeko, Deustuko Unibertsitateko Ingeniaritza Fakultateko katedradun Diego López de Ipiñaren ahotik. Ezagutzaz beteriko bidaia horretan, arte-historialariek egiten duten lana zertan datzan, iktusak gazteen artean eraginik ba ote duen edo elebitasunaren fenomenoari buruzko azterketa ere ezagutu ahal izan dute jakin-minez beteriko gazteek.
Jakiundek ikasturte honetarako atondu duen programa Gipuzkoan eta Bizkaian egin den hitzaldi-zerrenda luzearekin osatu da, hainbat jakintza-arlotako gaien inguruan. Besteak beste, mikrobiota eta nutrizioaz aritu dira, Ukrainaren inbasioa Nazioarteko Zigor Gortearen eskumenen ikuspuntutik aztertu dute, Ingeniaritza Biomedikoaren erronkak ezagutu dituzte, adimen emozionalaz jardun dute edo programazio-lengoaien gaian sakondu dute, betiere gai bakoitzeko aditurik onenen eskutik.
