- ONCE Euskadik Gipuzkoako eta Arabako futbol-federazioek sustatutako proiektu solidarioak, Sara de la Rica, Hirekin elkartea, Osakidetza eta Radio Vitoria-EITBko Déjate llevar irratsaioa saritu ditu
VG 2024 06 18
Nerea Melgosa Eusko Jaurlaritzako Berdintasun, Justizia eta Gizarte Politiketako sailburuak nabarmendu du “euskal gizarteak, bertako erakundeekin batera, planeta osoko biztanleen beharrei laguntzeko eta erantzuteko adierazi duen gaitasun eta bokazio solidarioa”. Melgosak Gasteizen egindako galan parte hartu du gaur arratsaldean. Bertan, ONCE Gizarte Taldeak Gipuzkoako eta Arabako futbol-federazioek sustatutako bost proiektu solidario, Sara de la Rica Ekonomia katedraduna, Hirugarren Sektore Sozialeko Hirekin enpresa-elkartea, Osakidetza eta Radio Vitoria-EITBko Déjate Llevar irratsaioa saritu ditu.
ONCE Euskadiren sari solidarioek, bere kategoria ezberdinetan, erakundeek, organizazioek eta pertsona partikularrek gizartearen esparruan egindako lanak aitortzen dituzte. Gipuzkoako eta Arabako futbol-federazioak saritu ditu futbol inklusiboaren alde egindako lanagatik eta Déjate llevar irratsaioa asteburuetan desgaitasuna duten pertsonen bizipenak bistaratzeagatik ‘(In)visibles’ atalean.
Sara de la Rica Euskal Herriko Unibertsitateko katedraduna aukeratu du bere ibilbide pertsonal eta profesionalagatik, bai eta gizarte-ekonomiarekin duen konpromisoagatik ere Iseak Fundazioaren bitartez (fundazioaren sortzaileetako bat da). Hirekin elkarteari dagokionez, epaimahaiak baloratu du hirugarren sektoreko 65 erakunde baino gehiagoren bidez “zaintzaren edo inklusioaren arloan egiten duen lan itzela”, eta Osakidetzaren kasuan desgaitasun intelektuala duten pertsonen laneratzea normalizatzeko sinatutako hitzarmena nabarmendu du.
Melgosa sailburuak, Emilio Sola batekin, gogora ekarri du joan den martxoan indarrean jarri zen Eusko Jaurlaritzaren Lankidetzarako eta Elkartasunerako Lege berria. Lege horren artikulazioan, besteak beste, administrazio publikoek, Euskadiko GGKEen Koordinakundeak, akademiek, zentro teknologikoek, erakunde feministek, LGTBI+ kolektiboek, pertsona migratuen elkarteek, Nazio Batuen Erakundeko agentziek eta hezkuntza-eragileek parte hartu zuten.
Legearen helburuak dira giza garapena eta jasangarritasuna sustatzea; pobrezia eta bazterkeria eragiten dituzten egiturazko arrazoiak eraldatzea; eta berdintasunik ezaren aurka eta giza eskubideen eta justizia globalaren alde borroka egitea. Gainera, gizarte askeak, demokratikoak, baketsuak eta inklusiboak sustatu nahi ditu, bai eta gizartearen balioen aldaketa eta mobilizazioa ere helburu horiek lortzeko.
