- Saria astearte honetan emango da Gasteizko Europa Jauregian
Osakidetzak 2024ko Sari Solidarioa jasoko du astearte honetan, hots, ONCE Talde Sozialak autonomia-erkidegoan urtero ematen duen sari instituzional gorena. Zehazki, euskal osasun sistemak Administrazio Publikoaren kategorian jaso du saria, adimen-desgaitasuna duten pertsonen enplegurako sarbidea normalizatzeko sinatutako hitzarmenagatik.
Osakidetzari emandako aitorpenaren arrazoia izan da EAEko hainbat elkarterekin sinatuta duen hitzarmena. Hitzarmen horren helburu nagusia adimen-desgaitasuna duten pertsonak Euskal Osasun Zerbitzu Publikoko lanpostuetan sartzea eta finkatzea da. Osakidetzak gogorarazi duenez, hitzarmenak esparru horretan lankidetza sendotzea dakar, eta, batez ere, adimen-desgaitasuna duten pertsonen gizarteratzean eta laneratzean aurrera egiten jarraitzea.
Ildo horretan, Osakidetzak dagoeneko onartu ditu (eta bide horretan jarraitzeko asmoa du) Enplegu Publikoaren Eskaintzak, adimen-desgaitasuna duten pertsonentzat gordetako lanpostuekin lanbide-kategoria desberdinetan.
Hauek izan dira epaimahaikideak: Nerea Melgosa, Eusko Jaurlaritzako Berdintasun, Justizia eta Gizarte Politiketako sailburua; Eugenio Prieto, ONCEko kontseilari nagusia; José Antonio Pérez Arias, ONCE Euskadiko Lurralde Kontseiluko presidentea; Usue Vallejo, ONCE Euskadiko ordezkaria; Alazne Olabarria, ONCE Euskadiko Lurralde Kontseiluko presidenteordea; Aitor Bedialauneta, EDEKAko presidentea eta Pertsona Gorren Euskal Federazioko presidentea; Iratxe Celis, Euskadi Irratiko kazetaria; eta Alejandro Martínez Berriotxoa, Eroski Fundazioko zuzendari nagusia eta Eroskiko Osasun eta Jasangarritasuneko zuzendaria. Epaimahaiak honako hau adierazi du, Osakidetzari dagokionez: «nabarmena da aukera-berdintasunarekiko duen konpromisoa eta erakunde espezializatuekin izandako lankidetza, lan-ingurunean laguntza egokia dagoela ziurtatuz».
Osakidetzaz gain, epaimahaiak beste lau erakunderi eman die saria: Gipuzkoako eta Arabako Futbol Federazioei, Sara de la Rica UPV/EHUko Ekonomia katedradunari; Hirekin Euskadiko Esku-hartze Sozialeko Hirugarren Sektoreko Enpresa Elkarteari; eta EITB Gasteiz Irratiaren «Déjate Llevar» programari.
Saria astearte honetan emango da, 18:30ean, Gasteizko Europa Jauregian.
