Behin Foru Aldundiak onartuta, aldameneko udalerrietako 118 taxik hiriburuan zerbitzua eman ahal izango dute
Donostiako Udalak administrazioen arteko hitzarmena onartu du Donostia, Andoain, Astigarraga, Hernani, Lasarte-Oria, Urnieta, Usurbil, Lezo, Oiartzun, Pasaia eta Errenteriako udalen artean. Hitzarmen horren bidez, Gipuzkoako Foru Aldundiari eskatzen zaio Araubide Bereziko Eremu bat sor dezala automobiletan bidaiariak garraiatzeko zerbitzuak emateko.
Eneko Goia alkateak nabarmendu duenez, Araubide Bereziko Eremu honen helburua «hiriko taxi-zerbitzua hobetzea eta eskari-puntei erantzun ahal izatea da, gaur egun Donostian zein inguruko beste udalerrietan dauden udal-lizentzien kopurua handitu gabe«.
Goiak azaldu duenez, «datozen egunetan Foru Aldundiari eskatuko diogu hitzarmena sinatuta duten udalerriekin egindako akordioa ontzat emateko, eta ahalik eta lasterren aktibatzeko eskatuko diogu, uda honetan bertan martxan izan ahal izateko«.
Une honetan, Hernanik, Astigarragak, Lasarte-Oriak eta Donostiak dagoeneko onartuta dituzte hitzarmenak, eta Urnietak eta Errenteriak datorren asterako egingo dute. Beraz, udalerri horiek Eremuaren ezarpenaren lehen fasearen parte izango dira. Usurbil, Pasaia, Andoain, Oiartzun eta Lezo laster onartzeko zain daude.
2023ko maiatzean sinatutako hitzarmena ez zen gauzatu, baina lanean jarraitu da akordioa hobetzeko eta proposamen berri bat onartzeko. Donostiako Udalak lideratutako prozesuak oso jarrera ona izan du inplikatutako udalerri guztien aldetik, eskualde osoko zerbitzua hobetzeko balioko baitu.
Akordio honek 4 urteko indarraldia izango du, beste 4 urtez luzatu ahal izango da, eta akordioa sinatzen duten Udalek Eremua bultzatzeko eta harmonizatzeko elkarrekin lan egiteko duten konpromisoa islatzea du helburu. Halaber, erabilbarri egongo den egunak eta ordutegiak ezartzen dira.
Araubide Bereziko Eremu berria sortuta, hirian dauden 308 taxiei beste 118 gehitzea lortzen da, eskaintzaren eta eskariaren arteko oreka hobetzen lagunduz, batez ere eskaria oso altua den momentuetan erantzuna emateko zerbitzua neurriz kanpo dimentsionatu beharko litzatekeen kasuetan.
Horrela, Eremua abian dagoenean, hiriko garraio zerbitzua osatuko da hitzartutako edozein udalerritako taxiek hiri-zerbitzuak beste batean eman ahal izateko aukerarekin, betiere eremua indarrean badago onartutako egutegiaren arabera dagokion udalerrian. Hala, adibidez, Eremua Donostian indarrean dagoen egun eta orduetan, gainerako udalerrietako taxiek hirian eman ahal izango dituzte zerbitzuak.
Era berean, hiriarteko garraio zerbitzua osatuko da hitzartutako edozein udalerrik hiriarteko zerbitzuak beste udalerri batean eman ahal izateko aukerarekin, baldin eta eremua udalerri horretan indarrean badago, onartutako egutegiaren arabera. Horrela, Eremuaa Donostian indarrean dagoen egun eta orduetan, beste udalerri bateko taxiek hiriarteko zerbitzuak eman ahal izango dituzte, Donostian jasotzen badituzte.
Bi kasuetan, zerbitzua ematen den edo bilketa egiten den udalerriko taxiei aplikatzen zaizkien baldintza berberetan emango da zerbitzu hori.
Donostialdeko Araubide Bereziko Eremua sortzearekin batera, Jarraipen Batzorde bat jarriko da abian. Batzorde horren eginkizunak izango dira Eremuaren arauak behar bezala betetzen direla zaintzea eta horren inguruko gaiak proposatzea eta horiei buruzko txostenak egitea.
