- Euroeskualdeak 499.950 € banatuko ditu 20 proposamenen artean, “Euroeskualdeko Hiritartasuna” 2024 Proiektu Deialdiaren esparruan, euroeskualdearen nortasuna eta lurraldeko eragileen ezagutza indartuko duten proiektuak bultzatzeko
- Edizio honetan, Euroeskualdeak 47 hautagaitza jaso zituen kultura, kirol, hezkuntza, gazteria, eleaniztasun eta gizarte-erronka garaikideen esparruetan
Euroeskualdeko Batzorde Betearazleak, bere hiru gobernu kideetako ordezkariek osatua, «Euroeskualdeko Hiritartasuna» 2024 Proiektuen Deialdiaren hautaketa onartu du. Mugaz gaindiko 20 lankidetza-proiektu finantzatuko dira Akitania- Berriaren, Euskadiren eta Nafarroaren artean, ia 500.000 eurorekin. Hiru aldeko partzuergoek kultura, kirola, hezkuntza, gazteria, eleaniztasuna eta gizarte-erronka garaikideen arloetan aurkeztutako 47 hautagaitzen artean aukeratu dira proiektuak.
Euroeskualdeak 9 ekimen hautatu ditu kulturaren esparruan, 3 gizarte-erronka garaikideen eremuan, 3 kirolaren eremuan, 2 hezkuntzaren eremuan, 2 gazteriaren eremuan eta bat eleaniztasunaren eremuan, gizarte-eremuan lortutako emaitzak garatzen jarraitzeko eta mugaz gaindiko ondarea zaintzeko helburuarekin.
Kultura – 9 proiektu
- PIRENAUES II: proiektu hau PIRENAUESen bigarren fasea da, 2023an sustatua, eta Zaldua eta St-Jean-Le-Vieux aztarnategi erromatarretan ikerketa arkeologikoarekin jarraitzea du helburu. Mugaz gaindiko ondare hori modu inklusiboan sustatu eta zabalduko da, 4 hizkuntzatan (FR-CAS-EUS-ANG).
- ETORKIZUNEKO IKUSLEAK: proiektu honek zinemaz gozatzea eta ikusle gazteenen gaitasun kritikoa garatzea du helburu, filmen proiekzioen eta ikus-entzunezko hezkuntza eta alfabetizazioko tailerren bidez.
- DANSPIRENAIKA: proiektuaren helburua dantza parte-hartzaileko hiru jaialdi antolatzea da, kaleko dantza-jarduerekin (erromeriak, errondak, etab.), tailerrekin eta bestelako jarduera osagarriekin.
- EUSKAL IHAUTERIEN BERPIZTEA: proiektua euskal inauteriei eta azken urteetan izan duen berpizteari buruzko erreportaje sorta bat egitean datza, batez ere gazteei esker.
- BILKETA: proiektu honek Bertsolaritzaren jarduera osoa sistematizatu nahi du, euroeskualdeko ondarea kontserbatzeko, sustatzeko eta zabaltzeko.
- KARRIKAN BERRIRO: Karrikan kaleko arteak sustatzeko mugaz gaindiko plataforma bat da, sortzen ari diren bi konpainiari laguntza pertsonalizatua ematen diena, eta ikuskizunak sortzeko, sustatzeko eta zabaltzeko baliabideak eta ezagutzak ematen dizkiena.
- LOTARAKO IPUINAK: 5 eta 10 urte bitarteko haurren artean euroeskualdeko kulturak eta hizkuntzak sustatuko dituzten 12 audiodrama ekoiztea da proiektu honen helburua, lau hizkuntzatan (FR, CAST, EUS eta okzitaniera).
- URRATSETAN: proiektu honen helburua hiru dantzari taldek Korrontzi taldearen musikarekin ikuskizun bat sortzea da.
- TEATRODIX: proiektu honen xedea Euroeskualdeko hiru hizkuntzetan hainbat kultura-ekintza abian jartzea da, honako gai sozial hauen inguruan: immigrazioa, guztiontzako kulturarako irisgarritasuna, kulturartekotasuna eta aniztasunaren baterako existentzia mugaz gaindiko dimentsio batean.
Kirola – 3 proiektu
- BIDASOA ISURIA: proiektua mugaz gaindiko eskubaloiko hiru kluben arteko lankidetzan oinarritzen da, eskubaloiaren bidez garapen pertsonala sustatzeko. Besteak beste, entrenamendu-saio bateratuak, kirol-ekitaldiak eta jardunaldi sozialak antolatzen dira herritar, enpresa eta erakundeentzat.
- BENNA: hiru lurraldeetako saskibaloi-federazioen arteko lankidetza horren bidez, lagunarteko partidak, entrenamendu-saioak, jokalarientzako kanpamendu teknikoak, arbitroen eta entrenatzaileen prestakuntza, eta talde behartsuen integrazioan laguntzeko gizarte- eta kultura-jarduerak antolatu nahi dira.
- EHTE: proiektuaren helburua da marka bat sortzea, elkartutako lau trail-estazioak batuko dituena eta tokiko trail runner eta mendi-ibiltarien artean modu eraginkorragoan sustatuko dituena; aldi berean, tokiko ekonomia sustatuko da eta sentsibilizatuko da errespetuzko kirol-praktiken garrantziaz.
Gizarte-erronka garaikideak – 3 proiektu
- MUGALUR: proiektu honek mugaz gaindiko lurraldeetako biztanleak, ikertzaileak eta artistak bildu nahi ditu, mugaren gaiari buruzko eztabaida eta hausnarketa sustatzeko.
- GIZARTERATZE KOMUNITARIO BERRIRANTZ: proiektuak Euroeskualdean aplika daitezkeen esku-hartze sozialeko eredu berritzaileak identifikatu nahi ditu, bereziki gizarte eta hezkuntza arloko esku-hartze irekiaren, belaunaldien eta kulturen arteko lan komunitarioaren, harreraren eta familia babes espezializatuaren eremuetan.
- BERTOKIN: proiektu honen helburua Euroeskualdeko zerbitzuen sektoreko erakunde eta profesionalen arteko lankidetza-sare bat sortzea da, etorkinen harrerarako, integrazio sozioprofesionalerako eta mugikortasunerako mugaz gaindiko protokolo bat atari digital gisa abian jartzeko.
Hezkuntza – 2 proiektu
- EMAZU ESKUA: proiektuaren helburua mugaz gaindiko ikastetxeen arteko trukeak sustatzea da, hiru lurraldeetako ikasleak eta irakasleak elkartzeko jardunaldi tematikoak antolatuz.
- FAMILI’ON: proiektu honen helburua bi asteko hizkuntza-oporrak antolatzea da, euskara mailaren arabera hainbat ikastaro eta jarduera egingo dituzten familientzat.
Gazteria – 2 proiektu
- MUI: proiektuaren helburua elkartutako mugaz gaindiko hirietako gazteentzat opor ibiltariak antolatzea da, gune hori aurkitu eta ezagutu ahal izan dezaten, euskara hizkuntza komuna izanik.
- JEDD: proiektu honen helburua Iruñera eskualdeko gazte boluntarioen mugaz gaindiko mugikortasuna antolatzea da, ikasteko eta transmititzeko grinarekin.
Eleaniztasuna – proiektu 1
- BEHA 3.0: proiektu honek datuen kultura sustatu nahi du euskal komunikabideetan, datu horiek digitalizatzen laguntzeko, erabakiak hartzeko datuen bilketan, analisian eta erabileran oinarrituta.
«Euroeskualdeko Hiritartasuna» proiektuen deialdiari buruz
«Euroeskualdeko Hiritartasuna» proiektuen deialdia Akitania-Berria Euskadi Nafarroa Euroeskualdeak sustatutako programa bat da, lurraldeko eragileen arteko elkar ezagutza hobetzeko, eleaniztasuna sustatzeko, kultura zabaltzeko, euroeskualdeko gazteak inplikatzeko eta talde kalteberak barnebiltzeko.
Lurraldearentzat garrantzia irabazten joan da urteetan zehar, eta guztira 3,7 milioi euroko aurrekontua duten 176 ekimen babestu ditu 2015ean kaleratu zutenetik. 2023an, ebaluaziora aurkeztutako 42 proiektuetatik 20 finantzatu ziren.
