Melgosa sailburuak eta Amilibia sailburuordeak jaso dute saria
Gizarte Zerbitzuetako Zuzendarien eta Gerenteen Estatuko Elkarteak gizarte-zerbitzuei dagokienez Estatu osoan lortu duen kalifikaziorik altuena lortu du Euskadik 2023an. Eusko Jaurlaritzari saria emateko ekitaldian, gaur Madrilen, Nerea Melgosa Ongizate, Demografia Erronka eta Gazteriako sailburua, Lide Amilibia Gizarte Politiketako sailburuordea eta Nerea Ahedo Senatuko jeltzaleen bozeramailea izan dira.
Euskal gizarte-zerbitzuak izan dira autonomia-erkidego guztien artean 2023ko DEC indizean kalifikazio altua lortu duten bakarrak, eta puntuazio gorenetik hamar puntura geratu da. Zehazki, Euskadik 7,44ko balorazioa lortu du Gizarte Zerbitzuen Garapenaren Indizean, Nafarroaren (6,97) eta Gaztela eta Leonen (6,79) aurretik, Ertain gisa kalifikatuak izan baitira, Estatuko batez bestekoa 5,21ekoa izan den baremo batean.
Nerea Melgosa sailburuak eskerrak eman dizkio Gizarte Zerbitzuetako Zuzendarien Estatuko Elkarteari, bai eta bere sailak eta aurreko
legegintzaldietan izan direnek egindako lanagatik ere. “Herritarren ongizatea kontuan hartuta lan egiten dugu beti”, esan du, eta helburu hori lortzeko
erakundeen arteko lankidetzaren garrantzia azpimarratu du. “Gure osagai sekretua entzutea eta lan egitea da: Eusko Jaurlaritza, foru-aldundiak, udalak, lankidetza publiko-pribatua… Garrantzitsua da Euskadiko hirugarren sektore sozialaz hitz egitea, indartsua da, entzun egiten zaie eta aktiboki lan egiten da haiekin, haien eta euskal herritarren beharrak kontuan hartuta”, ondorioztatu du.
