Gobernu Kontseiluak 175.000 euroko laguntza-deialdi bat onartu du gaur, emakumeen ekintzailetza sustatzeko eta enpresa eta erakundeetako zuzendaritza-organoetan emakumeen talentua sartzeko.
Mikel Torres Lehendakariorde eta Ekonomia, Lan eta Enpleguko sailburuak proposatuta, Gobernu Kontseiluak ontzat eman du deialdi bat, laugarren urtez jarraian, emakumeen ekintzailetza sustatzen duten elkarteentzat eta emakumeak buru dituzten eta zuzendaritza-postuetan emakumeak sartzen laguntzen duten enpresentzat, betiere lankidetza-sareak sortzen badituzte eta gizartean parte hartzen eta elkarteetan garatzen laguntzen badute.
Ekimen hau 2030erako Enpleguaren Euskal Estrategian jasota dagoen sailaren lehentasunezko helburuaren barruan kokatzen da, hau da, lan-eremuan gizonezkoen eta emakumezkoen arteko berdintasuna lortzea. Mikel Torresek zuzentzen duen sailak kristalezko sabai hori hausteko eta emakumezkoek erantzukizuneko eta hobeto ordaindutako lanak egin ahal izateko aurreikusitako ekintza ugariei ere gehitzen zaie.
Dirulaguntza horiek eskuratu ahal izango dituzte egoitza soziala, jarduerak eta ezarpen nagusia Euskal Autonomia Erkidegoan duten erakundeek, baldin eta haien helburuetako bat emakumezkoen ekintzailetza sustatzea bada, bai eta enpresa eta erakundeetako zuzendaritza-organoetan emakumezkoen talentua sartzea ere. Berritasun gisa, aurten zabaldu egin da erakunde onuradunen izaera. Hala, irabazi-asmorik gabeko elkarteek ez ezik, irabazi-asmorik gabeko beste erakunde batzuek ere eskatu ahal izango dute dirulaguntza, hala nola federazioek eta kooperatibek.
Emakumeen ekintzailetzarako eta lidergorako bultzada hori Sailaren eta haren mendeko erakunde autonomoen (Lanbide eta Osalan) soldata-arrakala eteteko beste jarduera batzuei gehitzen zaie, hala nola «Balio bereko lana» gidaliburua zabaltzea, Soldata Arrakalari buruzko Kongresua, emakumezkoak sektore maskulinizatuetan prestatzeko eta birkokatzeko programa, Soldata Berdintasunari buruzko Jardunaldiak egitea, edo genero-ikuspegia sartzea «2021-2026 Laneko Segurtasun eta Osasunerako Euskal Estrategian», besteak beste.
