- Hainbat deialditan berebiziko garrantzia du Euskal enpresek inbertitzeak (giza kapitalean, teknologian eta ekipamenduan)
- Gaur, lehendabiziko aldiz, Enplegu Zerbitzu Publikoaren Administrazio Kontseiluak buru izan du Mikel Torres (Lehendakariorde gehi Ekonomia, Lan eta Enpleguko sailburua)
Gaurko bileran, Lanbide-Euskal Enplegu Zerbitzuaren Administrazio Kontseiluak 30 milioi euroko diru laguntzak onartu ditu. Bertan, aparteko garrantzia hartu du lehentasunezko arretako kolektiboen eta talde zaurgarrien prestakuntzak. Gaurko Administrazio Kontseiluak, lehendabiziko aldiz, Mikel Torres izan du buru (Lehendakariorde gehi Ekonomia, Lan eta Enplegu sailburua). Gainera, hainbat deialdi onartu dira Euskal Autonomia Erkidegoko enpresen giza kapitalean eta teknologian inbertitzen laguntzeko.
Enplegu-proiektu integralak. Lehentasunezko arretako kolektiboentzako
Laguntzek xede dute banakako ibilbideak garatzea (bai 45 urtetik gorako langabeentzat, bai eta zaurgarritasun-egoeran edo bazterketa-arriskuan dauden pertsonentzat ere). Proiektu horiek hainbat motatako ekintzak konbinatzen dituzte (hala nola lan-orientazioa, prestakuntza eta gaitasunak eskuratzea, laneratzea, eta lanpostuak sortzea); hori guztia, enplegua lortzean berdintasun eraginkorra eta diskriminaziorik eza bermatuta. Beraz, laguntzek helburu dute premia handiko biztanleek lan-eskarmentua eskuratzea; beraien laneratzea egonkorragoa izan dadin (beti ere barne hartuta prestakuntza-jarduerak eta banakako laguntza).
Deialdiak 11,5 milioi euroko zuzkidura du (2024 eta 2025). Eta Enpleguaren eta Inklusiorako eta Diru-sarrerak Bermatzeko Euskal Sistemaren legeek markatutako bideari erantzuten jarraitu nahi du. Ekimen arrakastatsu horri esker, 2023an, orotara, 44 proiektu jarri ziren abian ( 17 proiektu, 45 urtetik gorakoei zuzenduta; eta gainerako 27, zaurgarritasun-egoeran edo bazterketa-arriskuan daudenei). Zehazki, 437 pertsona artatu zituzten ( 200 emakume eta 237 gizon).
Proiektu bereziak. Gizarteratzeko eta berrikuntza soziolaboraleko
Horrez gain, Lanbidek onartu du 3,3 milioi eurotan handitzea gizarteratzeko eta berrikuntza soziolaboraleko proiektu bereziak garatzeko laguntzak. Ondorioz, guztira, laguntzek 10,3 milioiko zuzkidura izango dute. Eta xede dituzte enplegua lortzeko edo mantentzeko zailtasunak dituzten landunak zein langabeak.
Proiektu bereziak erakunde publiko edo pribatu batek edo batzuek bultzatzen dituzte. Bertan, hainbat arlotako esku-hartzeak koordinatzen dituzte ( prestakuntza, orientazioa, enplegua eta besterik). Eta xede dute parte-hartzaileen enplegagarritasuna eta gaitasun pertsonal zein profesionalak bultzatzea edo indartzea. Diru-hornidura banatuko da talde zaurgarrientzako proiektuen eta berrikuntza- eta esperimentazio-proiektu berezien artean.
Berrikuntzan inbertitzea. Enplegurako lanbide-heziketako erakundeei zuzenduta
Deialdiak xede du enplegurako lanbide-heziketako erakundeei laguntzea azpiegitura berritzaileen inbertsioa finantzatzen (betiere EAEn kokatutako instalazioetan). Prestakuntza-ekintzak bermeekin eman daitezen bultzatu nahi da (kalitatearen, eguneratzearen eta eraginkortasunaren ikuspegitik), eta enpresen eta lan egiten duten ekoizpen-bitartekoen errealitate teknologikora egokituta egon daitezen. Horrela, Euskal Enplegu Zerbitzuak diruz lagundutako prestakuntzak merkatuaren benetako beharrei erantzungo die, enpresen lehiakortasuna eta langileen laneratzea bultzatuta.
2024ko deialdian, Lanbidek 4 milioi euro bideratu ditu. Eta Eusko Jaurlaritzaren mendekoak ez diren prestakuntza-erakunde pribatuek zein publikoek baliatu ahalko dituzte. Egin beharreko jardueren artean badago, besteak beste, makineria edo ekipamendu aurreratuak erostea edo alokatzea (prestakuntza-espezialitatea eman ahal izateko).
Prestakuntza-ekintza estrategikoak
Era berean, 2024. eta 2025. urteetan, kontseiluak onartu du 3,2 milioi euro erabiltzea EAEko enpresek programatutako prestakuntza-ekintza estrategikoak egiteko (beti ere, langileen gaitasunak eta kualifikazioak hobetze aldera).
Prestakuntza-ekintzek premien diagnostikoa izan behar dute oinarri, eta lotura zuzena enpresaren proiektuarekin. Halaber, diagnostikoak argi zehatuko du ze ekintza aurkeztu diren, eta ze lehentasuna izango duten langile hartzaileek.
Aurreko urteetan, deialdi bakoitzean 1.400 prestakuntza-ekintza inguru egin ziren. Eta 7.000 langilek baino gehiagok parte hartu zuten.
Prestakuntza. Langile kualifikatuen eskari handiko sektoreetan
Deialdi honen bidez, prestakuntza-jardun berritzaileak garatu nahi dira, non eta profesional espezializatuen eskari handiko sektoreetan, adibidez: logistika- eta garraio-sektorean ( nazioarteko garraioaren adarrean, eta trantsizio- eta aduana-enpresetan); programazio eta garapen informatikoaren eremuan (Boot Camps metodologia onarri hartuta); sorkuntza- eta musika-industria oso espezializatuak; jarduera fisikoak eta kirol-jarduerak; eta, azkenik, arreta soziosanitarioa.
Prestakuntzek milioi bat euroko zuzkidura dute. Lehentasunez, langabeei zuzenduta daude. Eta egiaztatutako edo erregistratutako prestakuntza-erakunde pribatuek zein publikoek eskatu ahalko dute aipatutako laguntza.
