- 50 profesional izan dira Guardian EUSKADIPREBEN estrategiaren esparruan antolatutako jardunaldian
- CO2 emanazioek eragin ditzaketen istripuak prebenitzeko ekipoak eta sistemak aurkeztu dira
- Tufoa karbono dioxidoa (CO2) da, modu naturalean sortzen da mahatsaren hartzidura alkoholikoan
Guardia, Araba, 2024/07/10
Guardiako Kuadrillaren egoitzan Osalanek EUSKADIPREBEN estrategiaren esparruan antolatutako jardunaldian upeltegietan tufoa (CO2) prebenitzeko sistemak aztertu dira gaur goizean. «Tufoa, hiltzaile isil bat. Prebentzio- eta babes-alderdiak» Euskadiko hainbat upategitako berrogeita hamar pertsona inguruk egoera kritikoen aurrean babesteko azken teknikak ezagutu dituzte.
Tufoa mahatsaren hartzidura alkoholikoan modu naturalean sortzen den karbono dioxidoa (CO2) da. Muztioaren azukrea alkohol bihurtzen denean, karbono dioxidoa askatzen du. Ardoaren tufoa oso arriskutsua da; izan ere, usaingabe denez, pertsonek ez dute detektatzen, eta konortea galtzea eragiten du baita heriotza ere.
Jardunaldian zehar mahastizaintza eta ardogintza ekoizpen-instalazioetan tufoa egoteak eragin ditzakeen istripuak prebenitzeko ezagutza zabaltzeak duen garrantzia nabarmendu da. Hizlarien iritziz, «funtsezkoa da ardo- eta txakolin-upategietako eta sagardotegietako eta garagardotegietako arduradunek eta langileek eskura dituzten tresnak eta ekipoak ezagutzea, horrelako istripuak prebenitzeko eta lan-ingurune seguruak bermatzeko«.
EUSKADIPREBEN estrategiaren bidez, erakundeek enpresek dituzten beharrak jasotzen dituzte, eta haiekin elkarlanean aritzen dira laneko segurtasunari buruzko hainbat gaitan lan-dinamikak sortzeko.
Jardunaldia hasteko, Alberto Alonsok Osalanen Arabako lurralde-zentroko prebentzio-arduradunak tufoak eragindako istripuen eta gertakarien tipologiari buruzko aurkezpena egin du, eta EUSKADIPREBENek egiten duen prebentzio-kanpainari buruzko informazioa eman du.
Ondoren, zenbait enpresak CO2 detektatzeko hainbat ekipo aurkeztu dituzte, tufoak eragindako istripuak prebenitzeko erabil daitezkeenak, bai eta aireztatzeko sistemak eta erreskate- eta ebakuazio-ekipoak ere, CO2ren presentziagatiko arrisku-egoeretarako. Jardunaldia amaitzean, bertaratutakoek aurkeztutako taldeak probatu dituzte.
Balio-katea
EUSKADIPREBEN estrategia sektorialak lan-ingurune seguruak, osasungarriak eta jasangarriak bultzatzen, sustatzen eta garatzen ditu pertsona guztientzat, lehen sektorean eta elikaduraren eta zuraren balio-katean erreferente eta nortasun-ikur diren berezitasunekin. Esparru soziolaboral bakoitzeko talde eta kolektibo profesional guztiek eta administrazioek parte hartzen dute, eskura dauden baliabide guztiak aprobetxatuta.
