- Hamar urtetan egiten ez diren hauteskundeen kanpaina urriaren 19tik azaroaren 25era izango da
Osakidetzako Zuzendaritza Nagusiak eta Euskal Osasun Zerbitzuan ordezkaritza duten sindikatuek ezohiko mahai sektoriala egin dute gaur, ostirala, uztailaren 19an, hurrengo hauteskunde sindikalak zein baldintzatan egingo diren adosteko. Bilera Osakidetzako Zuzendaritza Nagusiaren egoitzan egin da, Gasteizen.
Lortutako akordioen artean egutegiarena dago, 2024ko azaroaren 28an ezartzen duena bozketa-data. Bestetik, hauteskunde-kanpaina urriaren 19a eta azaroaren 25a bitartean egingo da, eta posta bidezko botoa eskatzeko azken eguna azaroaren 22a izango da.
Gaurko bileran, hauteskunde horien inguruko beste alderdi batzuk ere adostu dira, tartean hauteskunde-eremuak lurraldez lurralde, bozketa-ordutegiak, boto-txartelen ezaugarriak eta parte-hartzaileen eskubideak eta baimenak.
Akordioak garrantzi berezia du, duela hamarkada batetik ez baita hauteskunde sindikalik egiten Osakidetzan; zehazki, 2013tik, Euskal Autonomia Erkidegoan, eta, 2014tik, Gipuzkoan.
