- Euskal Estatistika Erakundeak (Eustat) gaur argitaratu duen hiruhileko Kontu Ekonomikoen Aurrerapenaren arabera, Ekonomia eta Plangintza Zuzendaritzaren aurreikuspenetik oso hurbil dauden datuak ematen ditu
Eusko Jaurlaritzak oso positibotzat jo du BPGren % 0,4ko hazkundea eta enpleguaren % 0,6koa, gaur Euskal Estatistika Erakundeak (Eustat) argitaratutako Hiruhilekoko Kontu Ekonomikoen Aurrerapenean aurreikusitakoaren arabera. Datu horiek Ekonomia eta Plangintza Zuzendaritzaren aurreikuspenetik oso hurbil daude; izan ere, Zuzendaritza horrek hiruhileko arteko hazkundea % 0,4an kokatu zuen, eta urte artekoa, berriz, % 1,9an. Aurreikusitako zifren eta orain argitaratutako zifren arteko hurbiltasunak indartu egiten du Jarraibide Ekonomikoetan 2025eko aurrekonturako argitaratutako agertoki makroekonomikoa, urte honetarako BPGaren hazkundea % 1,9 baita, eta hurrengorako % 2,1. Kontuan hartu behar da euroaren eremuaren hazkundea, urte arteko tasan, % 0,4 ingurukoa izan dela urte hasieran; beraz, Euskal Ekonomiaren emaitza oso positibotzat jo daiteke, Ekonomia, Lan eta Enplegu Sailak azpimarratu duenez.
Eustaten txostenak adierazten du euskal ekonomiaren hazkundea zerbitzuen bilakaeran oinarritzen dela nagusiki. Iruzkin hori bateragarria da, halaber, Ekonomiaren aurreikuspenarekin; izan ere, % 2,3ko tasa aurreratu zuen zerbitzuetarako, eta zifra apalak industriarako, oraindik ere nolabaiteko ahulezia erakusten baitu, ingurune ekonomikoaren tonu faltagatik. Alemaniarekin duen harreman estuak, BPGaren jaitsiera-tasak erregistratu dituena, azaltzen du, neurri batean, euskal industriaren emaitza apala, irailean zehatz-mehatz ezagutuko dena.
HAZKUNDE ESANGURATSUA
Bestalde, kontu ekonomikoen arabera, enpleguaren hazkundea oso esanguratsua izango da: % 0,6ko hobekuntza aurreko hiruhilekoaren aldean, eta % 1,8koa aurreko urteko hiruhileko beraren aldean. Tasa horiek ere oso hurbil daude Ekonomiak aurreikusitakoetatik, % 0,5 eta % 1,8 baitziren, hurrenez hurren. Horrek lan faktorearen itxurazko produktibitate-irabazi oso txikia uzten du, azken hiruhileko hauetan ohikoa den bezala, nahiz eta lan egindako ordu bakoitzeko produktibitatea handiagoa izan daitekeen.
Azken batean, gaur argitaratutako datuak Ekonomia Zuzendaritzaren aurreikuspenetik oso hurbil daude, eta aurtengo eta datorren urteko egoera makroekonomikoa indartzen dute; izan ere, EAEko ekonomiaren hazkundea % 2,0 ingurukoa izango da bi urteetarako, eta tasa hori EAEko ekonomiaren hazkunde potentzialaren gainetik dago.
