- Gobernantza, Administrazio Digital eta Autogobernu Sailak antolatzen du lehiaketa hau. Lehiaketaren helburua euskal administrazio publikoen katalogoak erabiliz datu irekiak berrerabiltzeko ideia eta aplikazio onenak saritzea da
- Ideien lehiaketa hiru kategoriatan banatuko da (osasuna eta gizartea, ingurumena eta iraunkortasuna eta kategoria orokorra) eta kategoria bakoitzeko proiektu irabazleek 3.000 euroko saria jasoko dute
- Berrerabiltzeko aplikazioen lehiaketak kategoria orokorrean, edizio honetan web zerbitzuen kategoria nobedade duena, 8.000 euroko saria emango dio proiektu irabazleari
Eusko Jaurlaritzak Euskadiko datu irekien berrerabilerarik onenetarako sarien bosgarren edizioan izena emateko epea ireki du. Lehiaketa honen helburua EAEko katalogo publikoetako datu publiko irekien multzotik abiatuta sortutako ideia, aplikazio eta zerbitzu onenak saritzea eta open data kultura bultzatzea da.
Lehiaketa hau Eusko Jaurlaritzak antolatu du, Gobernantza, Administrazio Digital eta Autogobernu Sailaren bitartez, eta Arabako, Bizkaiko eta Gipuzkoako Aldundien eta Vitoria-Gasteizko, Bilboko eta Donostiako udalen laguntza izan du.
Ideien lehiaketa hiru kategoriatan banatuko da: osasuna eta gizartea, ingurune adiskidetsua eta iraunkortasuna eta kategoria orokorra. Kategoria bakoitzeko proiektu irabazleek 3.000 euro jasoko dituzte, eta bigarren sariek 1.500 euro. Bestalde, aplikazioen lehiaketan, 8.000 euroko saria jasoko du kategoria orokorreko irabazleak, eta 5.000 eurokoa sailkatutako bigarren proiektuak. Edizio honetako berritasuna aplikazioen lehiaketan bigarren kategoria bat sortzean datza: web zerbitzuen kategoria, non proiektu irabazleak 8.000 euro jasoko dituen.
Datu irekietatik sortutako edozein zerbitzu, azterketa, bistaratze edo aplikazio aurkeztu nahi dituzten pertsonek egin dezakete, web bidez, esteka honetan. Eta aplikazioen lehiaketara aurkeztu nahi dutenek, gailu mugikorretarako zerbitzu, estudio, web aplikazio edo aplikazio bat garatzen duten proiektuak aurkeztuz, webgune honetan egin ahal izango dute. Bi kasuetan, proiektuak aurkezteko epea 2024ko urriaren 10ean amaituko da.
Open Data Euskadi
Eusko Jaurlaritzak formatu berrerabilgarrian eta erabilera-lizentzia irekien bidez argitaratzen ditu datuak Open Data Euskadi webgunean, herritarrek horietatik eratorritako zerbitzuak sortu ahal izan ditzaten. Zehazki, 8.000 datu-multzo baino gehiagoko katalogo bat du, eta horien artean estatistikoak, geografikoak, administratiboak, ingurumenekoak, turistikoak eta meteorologikoak nabarmentzen dira. Era berean, EAEko hiru hiriburuetako hiru foru aldundiek eta udalek open data atariak dituzte, datu irekien katalogoa kontsultatzeko.
