Estatutu Sozialen edukia egokitzeko beharretatik 35 egin dira dagoeneko, beste sei abian dira eta sei egiteke daude
2022ko maiatzean Ezohiko Batzarrean Athletic Cluben Estatutu Sozialen aldaketa onartzeak baldintza berri ezartzea exijitzen zion erakundeari eta azken urteetan horiek egikaritu dita ezarritako epeak betez, baita kasu askotan nabarmen aurreratuz ere.
2024ko abuztuan, Estatutuek eskatzen zituzten egokitze-beharren % 74,4 bete dira. Oro har, Estatutu Sozialen edukia abian jartzeko 47 betekizunetatik 35i erantzun zaie dagoeneko, sei abian dira eta beste seiri ekin behar zaie.
Egokitu diren azken betekizunen artean, aipatzekoa da aurreko Ohiko Batzarrean erregelamendu hauek onartu zirela:
- Diziplina-Erregalamendua
- Kontratazio Erregelamendua
- Erreferendumen, kontsulten eta partaidetza-prozesuen erregelamendua
- Abonuen eta kirol-esparruetan sartzeko eta egoteko erregelamendua
Horrez gain, Gizarte Erantzukizun Korporatiboaren Batzordea eta Futbol Batzorde Inklusiboa eratu ziren, eta Txokoan Diziplina Batzordearen edo Apelazio Batzordearen jakinarazpenak gaitu ziren, 83.2 artikuluak ezartzen duen bezala, eta bazkideari Klubarekiko harremana errazteko hainbat izapide egin ziren ere.
Martxan dauden helburuak
Joan den ekainaren 13an argitaratu ziren azken hiru erregelamenduak, eta bazkideei bi hilabeteko epea eman zitzaien alegazioak egin ahal izateko. Ekarpenak jaso eta eguneratu ondoren, aurtengo Batzar Orokorrean aurkeztuko dira, bazkideek onar ditzaten. Erregelamendu guztiak aurkezteko epea 2025eko abenduaren 31rako ezarrita dago araudian, eta, beraz, epeak murriztea lortu da. Hauek dira erregelamendu horiek:
- Hauteskunde Erregelamendua
- Gizarte Erantzukizun Korporatiboaren Erregelamendua eta Gobernantza Onaren Kodea
- Peñen, Peñen eta Klubeko kideen Erregelamendua
Egiteke dauden betebeharrak
Ebazteke dauden betekizunen artean daude banku-helbideratzeagatiko edo antzeko ordainketa-sistema elektronikoengatiko kuotak ordaintzeko sistemaren garapena eta bazkide berriak bitarteko elektronikoen bidez alta emateko sistema, datorren denboraldian zehar ezarriko dena.
Halaber, Klubaren dokumentazioa digitalizatzeko plan bat ezarri da, Athleticeko dokumentazio historikoaren sailak gauzatuko duena. Gizarte Erantzukizun Korporatiboaren Erregelamendua onartu ondoren, gobernantza onaren programa ere garatuko da.
Hauteskunde-erregelamenduari lotuta, eta hura onartu ondoren, bitarteko elektronikoen bidez aurkeztuko dira hautagaitzak, eta bitarteko elektronikoen bidez bozkatuko da hauteskundeetan.
Azkenik, bazkide-txartela digitalizatzeko modurik onena aztertzen ari gara, egiaztapen frogagarri gisa balio dezan.
Hemen betebehar guztiak kontsulta ditzakezu, baita zein puntutara arte bete diren ere.
