- Euskal Osasun Sisteman borondatez sartu dira, Osakidetzako zuzendari nagusiak uztailaren amaieran abian jarri zuen ezohiko jarraibidearen ondoren, abuztuan eta irailean estaldura handiagoa emateko lehen mailako arretari, EAGei eta Larrialdiei
- Datozen asteotan oraindik ere handitu daitekeen errefor96tzu horrekin, Euskadiko Lehen Mailako Arretako Unitateetako erreferentziako zentro guztiak zabalik egongo dira
- Gainera, beste 40 zentrotako jarduera indartu da eta jarduteko ordutegiak, eta, ondorioz, horietarako sarbidea zabaldu dira
Osakidetzak, Euskal Osasun Sistemak, profesional falta arintzeko udako plana ezarriz hasi du abuztua, langileen garai honetako oporrekin areagotu egiten baita arazo hori.
Udan asistentzia-zerbitzuak estaltzeko neurri handiagoan edo txikiagoan sortu ohi diren arazoei, aurten egoera areagotu duen arazo bat batu zaie, familia-medikuntzako barneko mediku egoiliarrek (BAME) 2024ko irailean amaitzen baitute prestakuntza, hau da, uda-garaia amaitu ondoren. Eta hainbat hilabetetako atzerapenarekin amaituko dute –berez ekainean amaitu behar zuten– 2020an abiatu zen promozioa covid-19aren lehenengo olatuak baldintzatu zuelako.
Hala ere, Osakidetzako zuzendaritzak uztailaren amaieran ezohiko neurriak jasotzen dituen ezohiko jarraibide bat eman izanari esker, uda honetarako behar bezalako asistentzia-estaldura bermatzen duten ezohiko neurriak hartu ahal izan dira. Alde horretatik, joan den udan baino 31 profesional gehiago kontratatu ahal izan dira (Familia Medikuntzako 27 eta Pediatriako 4), bai eta azken ikasturteko 58 barneko mediku egoiliar (BAME) ere, plan berri horretan sartu diren osasun-zentroetan eta etengabeko arretako guneetan (EAG) hutsik zeuden lanpostuak betetzeko. Profesional horien parte-hartzea borondatezkoa, sustatua eta, egoiliarren kasuan, gainbegiratua da.
Euskadin, une hauetan prestakuntza irailean amaituko duten Familia Medikuntzako (FM) 105 BAME eta Pediatriako 29 daude. Horietako 58 sartu dira dagoeneko Euskadiko udako planean, Familia Medikuntzako 47, Pediatriako 7 eta Anestesia espezialitateko 4. Lurraldez lurralde, Gipuzkoan 21 ditugu, Bizkaian 24 eta Araban 13.
Taulan ESI bakoitzeko banaketaren xehetasuna ikus daiteke.
40 zentro baino gehiago indartu dira
Azpimarratu behar da profesional horiek ezohiko 439 jarduera egingo dituztela guztira, eta 197 direla Familia Medikuntzan irekitako agendak eta 62 Pediatrian irekitakoak. Horrek guztiak, beste 40 zentrotako jarduera indartzeko aukera eman du (333tik) eta jarduteko ordutegiak, eta, ondorioz, horietako arreta eta sarbidea ere zabaldu ahal izan dira.
Euskadiko Lehen Mailako Arretako Unitateetako erreferentziako zentro guztiak egongo dira zabalik, nahiz eta batzuetan ordutegia 20:00etatik 17:00etara murriztuko den, garai honetan ohikoa den moduan.
Gainera, kontsultategi guztien % 94 egunero eta uda osoan egongo dira irekita.
Osasun Sailaren eta Osakidetzaren ustez, oso positiboa eta ona da egoiliarrak eta medikuak ezohiko proposamen horri atxiki izana. Hori dela eta, Susana López Altuna Osakidetzaren zuzendari nagusiak “prestakuntza espezializatua amaitzen ari den mediku gazteen belaunaldi horren ahalegina eta inplikazioa” aitortu eta eskertu du. Euskal Osasun Sistemaren zuzendaritza nagusiaren balorazioa oso positiboa da, eta eskerrak ematen dizkie bai egoiliarrei bai medikuei “uda honetan egingo duten ahaleginagatik eta hutsuneak betetzeko eta, kasu askotan, hilabete hauetan Euskadi osoan osasun-asistentzia mantentzea eta zabaltzea lortzeko erakutsi duten erantzukizunagatik”.
*Osakidetzako zuzendari nagusi Susana López Altunaren eta Asistentzia Sanitarioko zuzendari Maite Martínez de Albéniz Zabaletaren adierazpenak, Osakidetzaren 2024ko udako errefortzu-planari buruz.
