Nafarroako Arguedas eta Ujué herriak zuzeneko musikaren epizentroa izango dira Jesús Carbonell eta Ortzadar Euskal Folklore Taldearen emanaldiekin, Kultur 2024 programaren baitan. Kultura Zuzendaritza Nagusiak – Príncipe de Viana Erakundeak antolatutako emanaldiok askotariko musika estiloak eskainiko dituzte, gitarra eta kultura flamenkoetatik hasi eta folkloreraino, aire zabaleko agertokietan.
Asteburuko egitaraua irailaren 13an, ostirala, 20:00etan hasten da Jesús Carbonellekin Arguedaseko Zerkausiaren Plazan eta irailaren 14an, larunbata, 19:30ean Leonor Anderearen Plazan jarraitzen du Ortzadar folklore taldearen ikuskizunarekin. Gainera, egun berean, programak proposatzen duen jarduera turistikoaz gozatu ahal izango da, Urrutia Etxean, 10:00etatik 13:00etara.
Jesús Carbonell, Arguedasen
Arguedasko Zerkausiaren plaza izango da Jesus Carbonellen kontzerturako aukeratutako agertokia, irailaren 13an, ostirala, 20:00etan. Flamenko kantariak Guitarra del Herrero diskoa aurkeztuko du, bere jatorrian, tradizioan eta flamenkoaren kulturan oinarrituta. Flamenko puru eta kontserbadoretik hasi eta flamenko gaurkotuagorako trantsizio eta bilakaeratik igaroz, esentzia eta garbitasuna galdu gabe.
Flamenkoaren ikuspegitik bere bizitzako musiketan barrena egindako «bidaia» bat da. «Gitarraren bidez, zer naizen, nola sentitzen naizen, nondik natorren eta norantz joan nahi dudan adierazten dut. Gitarraren bidez nire emozioei irteera ematen diet; nire sentimenduak bideratzen lagundu dit, bizitzako unerik onenetan zein txarrenetan; baita hausnartzen, gelditzen eta gauzak beste ikuspegi batetik ikusten ere «.
Ortzadar Euskal Folklore Taldea, Uxuen
Irailaren 14an, larunbata, 19:30ean, Ortzadar taldea Doña Leonor de Ujué plazan izango da. Euskal Folklore taldeak musika eta dantza tradizionalak eta antzerki herrikoia taularatuko ditu.
Jose Jarautak (Joselico) 1894an Monteagudoko makiladurako idatzitako bertsoetan oinarritutako makiladuaren funtzioaren egokitzapena eskainiko du Ortzadarrek, Ortzadar taldeak berak 1978an moldatua. Emanaldi honek, gainera, Oier Zuñiga antzerki zuzendari nafarraren laguntza du. Ikuskizunean 16 dantzarik, 8 musikarik eta 4-8 aktorek hartuko dute parte.
Jarduera turistikoak
Gainera, irailaren 14an, larunbata, egitarauko jarduera turistiko batez gozatu ahal izango da, Urrutia Etxean 10:00etatik 13:00etara mami tapa eta ardo gorri nafarra dastatuz. Parte hartzeko beharrezkoa da info@casaurrutia.net helbidean izena ematea. Jarduerak 6 euroko prezioa izango du.
