Euskal Herriko Unibertsitateak (UPV/EHU) eta Euskadiko Gazteriaren Kontseiluak berritu egin dute aurretik zeukaten lankidetza hitzarmena, eta, hala, sendotu egin dute bi erakundeon arteko harremana. Hitzarmena Euskal Herriko Unibertsitateko Ikasleen eta Enplegagarritasunaren arloko errektoreorde Fernando Tapiak eta Euskadiko Gazteriaren Kontseiluko presidente Iratxe Uriartek sinatu dute, Gipuzkoako Campuseko Errektoreordetzan. Sinatutako hitzarmenaren xedea da alderdien arteko lankidetza antolatzea, besteak beste, baterako jardueren berri emateko, etengabeko koordinazioa eraginkorra izateko eta elkarri aholkularitza emateko.
Hala, sinatutako akordioaren xedea da urtero zenbait jarduera elkarrekin antolatzea, betiere gazteen interesen alde. Euskal Herriko Unibertsitateak, gainera, baterako jarduera horiek antolatzeko espazioak lagako ditu eta bere ikasleek horietan parte hartzeagatik hautazko kredituak lortzea ahalbidetuko du. Bestalde, Euskadiko Gazteriaren Kontseiluak aholkularitza zerbitzua eskainiko die euskal unibertsitate publikoko ikasleei.
Euskal Herriko Unibertsitateko Ikasleen eta Enplegagarritasunaren arloko errektoreordeak honako hau azpimarratu du: ”UPV/EHUren eta Euskadiko Gazteriaren Kontseiluaren arteko hitzarmena berritzeari esker, gazteekin zerikusia duten gaiak lantzen dituzten elkarte anitz biltzen dituen erakunde garrantzitsu horrekin berritutako lankidetzari bultzada emango diogu, eta, hala, unibertsitateko bizitzan ikasleen parte hartzea sustatzeko trenez hornituko dugu geure burua”.
Euskadiko Gazteriaren Kontseiluko presidente Iratxe Uriarte Eigurenek, halaber, honako hau azpimarratu du: “azken urteetan, aldatu egin da gazteek parte hartzeko duten modua, eta UPV/EHUrekin sinatutako akordio honek errealitate berrietara egokitutako lankidetza berrituaren alde egin dugun apustua islatzen du”. Horrez gain, uste du “hitzarmena unibertsitateko gazteen artean iritzi kritikoaren garapena bultzatzeko aukera bat dela, eta horrek sustatu egingo duela beren parte hartze aktiboa, gizartea eraldatzeko eragile diren aldetik”. Honako hau ere adierazi du: “hitzarmenak aukera emango digu ikasleak zuzenean eragiten dieten politika publikoetara hurbilarazteko, erabakiak hartzeko prozesuetan modu hurbilagoan eta eraginkorragoan inplikatuta”.
Euskadiko Gazteriaren Kontseiluak gazteekin zerikusia duten gaiak lantzen dituzten 60 bat elkarte biltzen ditu. Haren helburuak dira, besteak beste, gazteen eta gazteen elkarteen parte hartzea sustatzea, gazteentzako politiken garrantzia aldarrikatzea, erakundeek gazteen ikuspuntuak aintzat hartzea, eta erakundeen eta gazteen eta gazteen elkarteen arteko zubi lana egitea.
Sinatutako hitzarmenak lau urteko indarraldia du eta Gobernu Kontseiluak berriki onetsi duen Euskal Herriko Unibertsitateko Ikasleen II. Partaidetza Planean sartzen da. II. Partaidetza Planaren helburua da lehenengo planean ezarritako helburuetan sakontzea, haren efizientzia beste eremu batzuetara hedatzeko. Hala, lehenengo planak ikasleak erakunde espazioetan parte hartzera bultzatzen zituen eta bigarrenak, berriz, ikasleen lankidetza ildoa eta ikasleen eta unibertsitateko gainerako kideen arteko lankidetza ildoa ezartzea sustatzen du.
