Eusko Jaurlaritzako Hezkuntza Sailak 5,3 milioi euro emango ditu pentsamendu konputazionala, programazioa eta robotika sustatzen eta garatzen dituzten proiektuak finantzatzen laguntzeko, «Eskola Adimentsua» programaren barruan, 2024-2025 ikasturtean. Laguntza hauen onuradunak izango dira Haur Hezkuntzako bigarren zikloa, Lehen Hezkuntza, Derrigorrezko Bigarren Hezkuntza eta Batxilergoa ematen dituzten itunpeko sareko ikastetxeak eta itunpeko ikastetxe pribatuekin estatutu- zein erregelamendu-harremanak dituzten erakundeak eta federazioak.
Automatizazioaren txertaketa, robotika eta adimen artifiziala aldaketa sakonak eragiten ari dira gizartean, eta ikasteko, lan egiteko eta harremanak izateko gure modua birdefinitzen ari dira. Testuinguru horretan, alfabetatze digitala derrigorrezko premia bihurtu da, eta gaitasun aurreratuak menperatzea eskatzen du eta teknologia digitalaren erabilera etiko eta arduratsua. Irakasleek laguntza egokia eskaini ahal izatea funtsezkoa eta beharrezkoa da, irakaskuntza- eta ikasketa-jarduerak behar bezala eta modu eraginkorrean ezar daitezen, ikasleei bizitzan beharko dituzten konpetentzia digitalak garatzen lagundu ahal izateko.
Eskola Adimentsua programaren helburua da erantzun integral bat egituratzea, ikasgelaren barruan irakats laguntza barne hartzen duten prestakuntza-jarduera zehatzen bidez irakasleak gaituta eta eguneratuta; eta horren guztiaren osagarri gisa, irakasleen komunitatearen esku jartzea hezkuntza-baliabide ireki espezifikoak, ikasgelan erraz ezar daitezkeenak, bai eta ikastetxeei beharrezkoak diren programazio softwareen eta robotika hezigarriko hardwareen baliabideak ematea ere.
Hornikuntzarako, aintzat hartuko dira ikasleen eta hezkuntza-etaparen ezaugarriak.
