URAk Markiz ibaiaren ezkerraldeko zati bat zaharberritu du Markinezen, Bernedon. Ibaiertz naturala ordezkatu zuen euste-horma erabat bertikal bat higatu zuen urak, eta hein batean erortzea erraztu zuen. Horrek, era berean, ibaiertzeko lurrak ibilgura erortzea erraztu zuen.
Jarduera, funtsean, hormako eta eroritako lurreko hondakinak kentzean datza, aurrena; gero, harri-lubetazko oinarri bat jarri eta oinarri horren gainean enbor-bilbadura bat egin da; bertan aldaxkak jarri dira ibaiertzeko landaredi autoktonoak eremua bere egiteko.
Zehazki, haltzadi mediterraneoko basoko zuhaitz- eta zuhaixka-espezieak landatu dira lehengoratu den ertz-ezpondaren goiko aldean (lizarrak, haltzak, makal beltzak eta zuhaixkak, hala nola belazea, aligustrea, majueloa edo intsusa).
Horma bertikalek eta kanalizazioek hainbat inpaktu eragiten dituzte ibai-ekosisteman. Zeharkako jarraitutasuna eteten dute: pixkanakako gainezkatzeari kalte egiten diote, tokiko fauna ibaiertzetan hedatzea eragozten dute; ibaiertzeko landaredia eteten dute; eta ibaia korridore ekologiko gisa funtzionatzea ezinezko suertaraztea.
Ohikoa da horma horiek kolapsatzea. Kasu horietan, horma bertikala erabat kendu behar da, eta ibaiertz naturalizatu berri bat sortu, beharrezkoa bada bioingeniaritzako tekniken bidez egonkortuz. Horrela, ibaiertzaren egonkortasuna berreskuratzeaz gain, tartea naturalizatu egiten da, eta erriberako landarediaren jarraitutasuna berreskuratu.
Lanak egiteko 2 hilabete behar izan dira, eta 65.000 euroko inbertsioa, BEZa barne.
Proiektu hau Eskualde Garapeneko Europako Funtsak (EGEF) finantzatu ahal izango du.
