Osasun Sailak 250.000 € jarriko ditu laguntza horietarako, herritarren bizi-baldintzak hobetzera bideratzen diren proiektu partehartzaileak finantza daitezen
Osasuna sustatzea helburu duten eta jarduera fisikoarekin, elikadura osasungarriarekin, ongizate emozionalarekin eta osasuna eta ongizatea erraztuko dituzten inguruneekin lotuta egon daitezkeen jarduketak lagunduko dira diruz
Gobernu Kontseiluak, Osasun Sailak eskatuta, onartu ditu, 2024an Euskadiko tokiko esparruan, komunitate-partaidetzako prozesuen arloan osasuna sustatzeko jarduketetarako dirulaguntzen deialdiaren oinarriak.
Laguntza horien helburua da komunitate-partaidetzako proiektuak finantzatzea. Proiektu horiek bideratu beharko dira bizikidetza-espazioan bizi direnen bizi-baldintzak hobetzera, osasuna eta ongizatea hobetzeko prozesuetan ekintza indibidual eta kolektiboko gaitasunak indartzera eta gizarte-loturak eta -kohesioa sendotzera, barnean direla zaurgarritasun-egoeran dauden kolektiboak.
Horretarako, osasuna sustatzea helburu duten eta jarduera fisikoarekin, elikadura osasungarriarekin, ongizate emozionalarekin eta osasuna eta ongizatea erraztuko dituzten inguruneekin lotuta egon daitezkeen jarduketak lagunduko dira diruz, baita komunitatearen osasunerako eta ongizaterako garrantzizkoak diren beste alderdi batzuk ere.
Eusko Jaurlaritzako Osasun Sailak, aurten, 250.000 euro jarri ditu, guztira, laguntza-ildo horretan, eta, hala, erantzuten dio Osasun Publikoaren eta Adikzioen Zuzendaritzak tokiko esparruan osasuna sustatzearen alde egindako apustuari, herritarren osasun-egoera hobea lortze aldera.
Laguntza horiek bateragarriak izango dira beste administrazio publiko batzuek edo beste erakunde publiko edo pribatu batzuek —nazionalak, Europar Batasunekoak edo nazioartekoak— helburu bererako emandako dirulaguntza, laguntza, diru-sarrera edo baliabideekin. Edonola ere, ezin izango dira 8.000 eurotik gorako laguntzak izan proiektu bakoitzeko, ezta, proiektu bat baino gehiago aurkeztuz gero, 15.000 eurotik gorakoak ere erakunde onuradun bakoitzeko.
Laguntzak bitarteko elektronikoen bidez eskatu ahal izango dira, agindua EHAAn argitaratzen denetik hilabeteko epean, eta Euskadiko udalerriek, mankomunitateek eta gainerako toki-erakundeek jaso ahal izango dituzte, baita tokiko erakunde autonomoek eta tokiko merkataritza-sozietateek ere.
