Gobernu Kontseiluak gaur onartu du komunitate-esparruan adikzioen tokiko planak garatzen laguntzeko Eusko Jaurlaritzako Osasun Sailaren 2024ko ekitaldiko laguntza ekonomikoen deialdiaren Agindua.
Laguntza horietan Euskadin diharduten toki-erakundeentzako eta irabazi-asmorik gabeko erakundeentzako 1.735.900 euro daude. Laguntzak bideratzen dira komunitate-prebentzioko programak garatzera, adikzioen arloan arriskuak eta kalteak prebenitzeko eta murrizteko proiektuak egitera eta jokabide osasungarriak sustatzera, baita zenbait toki-erakundetako adikzioen komunitate-prebentzioko lantalde teknikoak mantentzera ere.
Tokiko esparruan, eta osasunekoak ez diren beste sektore batzuetatik, egiten diren jarduketetan osasuna sustatzeko helburuarekin egiten du Osasun Sailak laguntza horien deialdia, betiere Euskadiko VIII. Adikzio Planaren jarduketa-ardatzetan hobekien instalatutako programei eta proiektuei eutsi dakien, premia berriak identifika daitezen, premia horiei arreta emango dieten proiektu berriak babestu daitezen, eta ekimen berriak hobetzen lagundu dadin.
Horrela, Eusko Jaurlaritzak eta Osasun Sailak adikzioen fenomenoari komunitate-esparrutik heltzeko eta erantzuteko konpromisoari eusten diote, Euskadiko VIII. Adikzio Planaren arabera. Hain zuzen, plan hori da Euskadin adikzioen arloan garatzen diren estrategia eta esku-hartze guztiak planifikatu, antolatu eta koordinatzeko tresna nagusia.
Zehazki laguntza ekonomikoa bi dirulaguntza-ildotan banakatzen da:
- Adikzioen komunitate-prebentziorako tokiko planen garapena: 1.174.135 euro.
- Tokiko planei atxikitzen zaizkien adikzioen prebentzio komunitarioko programen eta, jardun-esparru horretan, jokabide osasungarriak sustatzeko programen garapena: 561.765 euro.
Agindu hau EHAAn argitaratu eta hurrengo egunetik aurrera hasiko da aurkezpen-epea, eta 15 egun baliodun igaro ondoren amaituko da, argitaratu eta hurrengo egunetik zenbatzen hasita.
