Ongizate, Gazteria eta Erronka Demografikoaren sailburu Nerea Melgosak proposatuta, gaurko gobernu kontseiluak Agintzari kooperatibari dirulaguntza zuzena ematea onartu du, Trapezistak programaren hedapena finantzatzeko. Trapezistak programak gizarteratzeko eta helduarora igarotzeko ibilbidean laguntzen die familiari laguntzeko sarerik ez duten gazteei.
Trapezistak lankidetza publiko/sozialetik eraikitzen da. Pandemia betean sortu zen programa da, eta sendotzea eta haztea lortu du. Eusko Jaurlaritzako Ongizate, Gazteria eta Erronka Demografikoaren Sailaren bultzadarekin, hirugarren sektore sozialeko 25 erakunde biltzen dituen eta Agintzari buru duen sareak garatzen du programa. Erakunde horiek guztiek esperientzia handia dute gizarte-laguntzan, hiru lurralde historikoetan. Sare horri esker, Trapezista presente dago Laudion, Amurrion, Gasteizen, Hernanin, Tolosan, Donostian, Barakaldon, Getxon, Etxebarrin, Arrigorriagan eta Bilbon.
2024rako, programak 393 plaza izatea aurreikusita zegoen. Hala ere, 2024ko lehen seihilekoan, Trapezistak programak dagoeneko 486 pertsonari lagundu die (451 gizon eta 35 emakume). 2024ko ekainaren 30ean, programak itxaron-zerrenda bat zuen, eta 139 pertsonak eman zuten izena. Programan parte hartu duten pertsonen kopurua handitzearen ondorioz, 2024rako hasieran gordetako kreditua urteko lehen sei hilabeteetan agortu da.
Horregatik, Jaurlaritzak interes orokorrekotzat jotzen du Agintzari enpresari zuzeneko dirulaguntza ematea, 2024ko bigarren seihilekoan Trapezistak programa gauzatzeko.
Trapezistak programaren helburua da laguntza-eredu bat diseinatzea eta gidatzea, gazteria- eta migrazio-politika normalizatuen barruan, ekintza positiboko programa batean oinarrituta. Programa horrek familia-laguntza sarerik ez duten gazteei laguntza ematen die gizarteratzeko eta helduarora igarotzeko ibilbidean, hiru jardun-irizpideren arabera: pertsonalizazioa, integraltasuna eta sektoreen arteko lankidetza.
Trapezistak programa Migraziorako Euskal Itun Sozialaren barruan dago, eta Euskal Harrera Eredua eratzen duten ekimenen sare zabal baten parte da. Eredu horretan, erakundeen eta parte hartzen duten udalen arteko koordinazioa funtsezkoa da. Euskal erakundeek bizikidetzaren, inklusio osoaren eta kultura-aniztasunaren alde egiten dute, migratzailea iritsi zenetik euskal gizartean sartzeko prozesuak errazteko.
Lehen seihilekoa
2024ko lehen seihilekoan, guztira, laguntza-sarerik gabeko 486 gazteri lagundu diete programa osatzen duten erakundeek. Denbora horretan 58 pertsonak (% 12) amaitu dute egonaldia, eta programaren emantzipazio-helburuak lortu dituzte. Eta soilik % 6,3, 31 pertsona irten dira programatik emantzipazio-helburuak lortu gabe. Hamarretik zortzik (% 81,7) Trapezistak programak eskaintzen duen laguntza pertsonalizatuaren prozesuan jarraitzen dute: 397 pertsona.
Lehen seihileko honetan, ‘trapezista’ profil errepikatuena hauxe da: gizona (% 93), 23,2 urteko batez besteko adinarekin, familiarik gabe migratua, batez ere Marokotik (% 87), Euskadin 18 hilabete baino gehiago sustraitua, hiri-ingurunean bizi dena, erroldatuta dagoena eta osasun-txartela duena, eta gizarte-laguntzako bere sarea eraikitzen ari dena.
