Datozen 4 urteetarako 4.000.000 euroko dirulaguntzaren helburua IBM Research-ekin konputazio kuantikoaren arloan bi ikerketa-akordioren (JRA) garapena finantzatzea da
Zientzia, Unibertsitate eta Berrikuntza Sailak proposatuta, Gobernu Kontseiluak Ikerbasque/Ikerbasque Fundazioarentzako laguntzak onartu ditu gaur, IBM Research-ekin konputazio kuantikoaren arloan bi ikerketa-akordioren (JRA) garapena finantzatzeko, 4 milioi euro 2024tik 2028ra bitartean.
«IKUR teknologia kuantikoak» estrategiaren esparruan Euskadin konputazio kuantikoa sustatzeko helburuarekin, Ikerbasqueren eta IBM Researchen (konputazio kuantikoko sistemen garapenean nazioarteko lidergoa duen erakundea) arteko epe luzerako aliantza bat ezarri da. Euskadi ikerketa, prestakuntza eta garapen teknologiko eta industrialari aplikatutako konputazio kuantikoan nazioarteko bikaintasuneko nodo bihurtzea du helburu.
Zientzia, Unibertsitate eta Berrikuntza Sailak bultzatutako aliantza estrategikoari esker, Euskadik munduko konputazio kuantikoko sistemarik aurreratuena instalatu eta erabiltzeaz gain, arlo horretako ikerkuntzarekiko eta etengabeko garapenarekiko konpromisoa adierazten du. Sailak abangoardiako ikerketa zientifikoaren alde egiten duen apustu garbiarekin guztiz lerrokatuta, aliantza horrek zientzia eta berrikuntza bultzatzen ditu Euskadin, eta konputazio kuantikoaren garapen globalari nabarmen laguntzen dio.
Hala, Ikerbasqueren, Zientziarako Euskal Fundazioaren eta IBMren arteko ikerketa-lankidetza sendotu egiten da elkarlaneko ikerketa-ildoen edo Joint Research Agreements (JRA) bidez. Akordio horiei esker, bi erakundeek elkarlanean lan egin dezakete proiektu espezifikoetan, baliabideak, ezagutzak eta teknologiak konbinatuz, konputazio kuantikoaren eta beste arlo zientifiko batzuen esparruan aurrera egiteko.
Gaur egun, bi JRA-tan ari dira lanean, eta, Gobernu Kontseiluak gaur onartutako laguntzari esker, bikaintasuneko ikerketarako bi lankidetza-ildo berri irekiko dira. Konputazio kuantiko aurreratuena honako bi ikerketa-arloei aplikatuko zaie: lehenengoa, Biomedikuntzaren, Zientzia Biologikoen eta Biomaterialen arloan; eta bigarrena, Energia handiko Fisikaren, Astrofisikaren eta Partikulen Fisikaren arloan.
