- Landa familiaren Lukianoko Armoki ganadutegiari belaunaldien arteko erreleboan egindako lana aitortu dioten
- Ramiro González Arabako Diputatu nagusia ere bertan izan da Adolfo Beltran de Gebarak, Soloitzak eta Aprorak ere bereizgarriak jaso dituzte, eta oroipen hunkigarria egin zaio Fernando Remirez de Ganuzari
Amaia Barredo Eusko Jaurlaritzako Elikadura, Landa Garapen, Nekazaritza eta Arrantzako sailburua Samaniegon izan da, Ramiro González diputatu nagusiarekin eta Noemi Agirre foru-diputatuarekin batera, Arabako nekazaritzako eta abeltzaintzako sektoreko pertsonek eta erakundeek egindako lana aitortzeko “Nekazaraba” galan. Barredo “bereziki pozik” agertu da Landa familiak Lukianon kudeatzen duen Armoki ganadutegiak “belaunaldien arteko erreleboa” kategorian jaso duen sariagatik.
Armoki etengabe eguneratutako abeltegi teknologikoa da, eta bere diseinuagatik, animalien ongizateagatik eta behi bakoitzeko dituen metro koadroengatik nabarmentzen da. Landa familiak zuzentzen du, eta jabeak Endika eta Gaizka Landa anaiak, haien aita Roberto eta osaba Javier dira.
Gaur egun Armokik batez beste eguneko eta behi bakoitzeko 3,6 jetzialdi lortzen ditu eta 47/48 litrora iristen da. 400 buru inguru ditu, eta horietatik 212 dira jezteko behiak. Kalitateei dagokienez, esneak % 3,58 gantz eta % 3,22 proteina ditu; zelulen zenbaketa 110.000 cel/ml da.
Elikaduraren bikaintasunaren kategoriako saria Barrundiako Adolfo Beltrán de Gebararentzat, LANIRINA proiektuaren sustatzaileetako batentzat, izan da. Berrikuntza kategoriako saria Soloitzak jaso du. Landa Garapena saria Aprorarentzat izan da eta ibilbide profesionalarena Fernando Remirez de Ganuzarentzat, Errioxa osoko mahastietako aditurik handienetako bat izan zena eta joan den apirilean 73 urterekin hil zena.
Soloitza 2020an sortu zen, pandemia betean. Gazta ekoizteko tradizioak hiru belaunaldi daramatza dagoeneko familian. Bere aro berriak tradizioa eta modernitatea uztartzen ditu, euren behien esnea kalitate goreneko gazta eta jogurt bihurtuz, esnekien ekoizpenean azken-azkeneko teknologia erabiliz.
Aprorak “olibondoen eta oliba-olioaren” zale diren olibazainak, errotak eta markak biltzen ditu. Bere helburua da Euskal Herriko olibondoaren eta olioaren milaka urteko kultura zabaltzea, olibondoak eta oliba-olio birjina estra (AOVE) landuz.
