Imanol Pradales lehendakaria, Alberto Martínez Osasuneko sailburuarekin batera, Ortuellako anbulatorioan izan da gaur goizean, eta bertan ezagutarazi ditu gripearen aurkako kanpainaren datuak. Kanpainaren bosgarren astean 404.000 pertsonak jaso dute txertoa —iaz, data horietan bertan, baino % 2,4 gehiagok—.Egoitzetan, % 73ko datuak jaso dira, eta 13.626 dosi eman zaizkie 6 hilabete eta 5 urte bitarteko haurrei; beraz, iazko kanpaina osoko azken kopurua gainditu da (iaz, guztira, adin-tarte horretako 12.971 haurri jarri zitzaien txertoa). Covid-aren aurkako 268.120 dosi eman dira, eta % 67k gripearekin batera hartu dute txertoa.
Aurtengo kanpainaren martxa ona gorabehera, lehendakariak dei egin du arreta ez jaisteko eta immunizazioak prebentzioaren funtsezko alderdi gisa duen garrantziaz jabetzeko, bai immunizazio indibidualak —arriskuko pertsonal eta, oro har, herritarrak—, bai immunitate kolektiboak, komunitatearen beraren immunitate handiagoa lortze aldera.
Hain zuzen, osasunaren prebentzio eta sustapenerako politikak areagotzera begira, Osasun Publikoaren kapitulua da gehien handitzen dena 2025eko aurrekontu-aurreikuspenean. Txertaketa- eta baheketa-programek ere % 30eko hazkundea izan dute, aurreko urtearekin alderatuta.
Txertoa jartzeko hitzordua Osakidetzaren web-orriaren bidez, Aurretiko Zita atalean, eska dezakezu, edo erreferentziazko osasun-zentrora telefonoz dei dezakezu. Gainera, txertaketaren bidez ez ezik, zenbait neurri errespetatuz ere prebenitu daiteke gripea, hala nola: eskuen higienea, espazio itxietan maskara erabiltzea (sintomak izanez gero, gomendagarria da), pilaketak saihestea eta espazio itxiak aireztatzea.
LEHEN MAILAKO ARRETA, PERTSONEN ARTEKOA
Ortuellako anbulatoriora egindako bisitan, lehendakaria Ezkerraldeko zentro horretako profesionalekin bildu da, eta bertatik bertara jaso du Euskal Autonomia Erkidegoko osasunaren inguruan duten ikuspegia. Haien aurrean, berretsi nahi izan du bera buru duen gobernuarentzat lehentasunezko dela lehen mailako arreta indartzeko apustua, osasun-sistema publikoaren ardatz bihurtu dadin. «Ez da sarrerako atea bakarrik; batez ere, gure osasun-patologien % 80 konpontzen da bertan, eta hor jarri behar dugu fokua», adierazi du, profesionalek helarazi dioten mezuarekin bat eginik, eta Euskal Osasun Hitzarmenaren baitan partekatutako diagnostikoaren funtsezko ardatzetako batekin bat etorriz, non eragile sanitario, politiko eta sozial nagusiek parte hartzen duten.
Helburu horrek, gobernu-agendan aintzat hartutako beste lehentasun batzuen artean, eskatzen du: asistentzia-maila horren funtzionamendua hobetzea, baita etengabeko arretako guneena eta larrialdiena ere; arreta espezializatuko itxaron-zerrendak murriztea; edo burokratizazioa murriztea. Horrez gain, plantillaren egonkortasunean sakondu behar da, eta horretarako, aurreikusitako enplegu-eskaintza publikoen deialdiak egingo dira, enplegu-eskaintza publiko berezia egingo da —betetzeko zailak diren Lehen Hezkuntzako medikuen plazak bete daitezen—, Osasun Mentaleko sarean profesionalen kopurua handituko da, edo Lehen Mailako Arretako eta Ospitaletako azpiegituretan inbertsioa handituko da.
Baina, gainera, Lehendakariak gaineratu duenez, «argi daukagu Lehen Mailako Arretaren gure ereduak pertsonatik pertsonara izan behar duela, hurbiltasun hori baita, hain zuzen ere, laguntza-eremu horren funtsa».
Bestalde, Osasuneko sailburu Alberto Martínezek Osakidetzako osasun-langile guztien lana eskertu du, baita osasun-zentroaren figuraren garrantzia nabarmendu ere, inguruko herrialde askotan ez baitago halakorik, eta «laguntza emateaz gain, osasunerako hezkuntza eta medikuntza prebentiboa, hau da, prebentzioaren barruko prebentzioa» ematen dituelako.
ORTUELLAKO ANBULATORIOA
Ortuellako anbulatorioak Ortuella, Trapagaran, Gallarta, Las Carreras eta Muskizko 36.700 herritarri ematen die arreta.
Zerbitzu hauek ditu: familia-medikuntza, pediatria, etengabeko arreta gunea, traumatologia, obstetrizia eta ginekologia, kardiologia, gastroenterologia, dermatologia, odontologia, oftalmologia, pneumologia, urologia, otorrinolaringologia, osasun mentala, endokrinologia eta errehabilitazioa
Zentroan lan egiten dute lehen mailako arretako sei medikuk, pediatra batek, hamahiru espezialistak, zortzi erizainek, odontologo batek, emagin batek eta zazpi administrarik.
Ezkerraldea-Enkarterri-Gurutzetako ESIan sartzen da. ESI horrek, guztira, lehen mailako arretako 29 zentro eta Gurutzetako Unibertsitate Ospitalea ditu, milioi erdi pertsona ingururi arreta emateko.
