Seihileko honetan, Euskadik Europar Batasuneko Hezkuntza, Gazteria, Kultura eta Kirol Kontseiluaren partaidetza koordinatu du hezkuntzaren eta kulturaren arloan. Koordinazio horren baitan, Kultura eta Hizkuntza Politikako sailburu eta lehendakariorde Ibone Bengoetxeak EBko Kontseiluan parte hartu du gaur arratsaldean, eta Alfabetatze Mediatikorako Europako Ituna proposatu du. Liburutegiek ikasteko, ezagutzak eskuratzeko, sozializatzeko eta gozatzeko zentro gisa duten rolari buruzko eztabaidaren esparruan autonomia-erkidegoek duten jarrera bateratuaren emaitza da proposamena. Bengoetxea lehendakariordeak, euskara hutsean egindako hitzaldian, itun horri gobernuak, elkarteak eta eragile sozioekonomikoak atxiki ahal izatea defendatu du.
Europar Batasuneko Hezkuntza, Gazteria, Kultura eta Kirol Kontseilua EBko Estatuetako ministroek osatzen dute, eta Hungaria da presidente seihileko honetan. Lehendakariordea Andoni Iturbe Kultura sailburuordearekin batera joan da Bruselara, eta “alfabetatze mediatikoan liburutegiek duten rola”-ri buruzko eztabaida politikoa izan du hizpide.
Bertan, Bengoetxea lehendakariordeak adierazi duenez, “egiaztatuta dago alfabetatze mediatikoaren maila altua funtsezko faktorea dela herritarrek erabaki informatuak har ditzaten aro digitalean; demokrazia parte-hartzailea, modernoa eta inklusiboa izateko aldez aurreko baldintza da, eta desinformazioa eta gorroto-diskurtsoak geldiarazteko balio du”. Testuinguru horretan, lehendakariordearen hitzetan, “liburutegiek berebiziko garrantzia dute alfabetatze mediatikoan eta sen kritikoaren garapenean, baliabideak, hezkuntza eta elkarrizketarako gune bat eskaintzen baitute”. Hori dela eta, Alfabetatze Mediatikorako Europako Ituna proposatu du, hainbat erakundek, gobernuk eta elkartek bat egin ahal izateko.
Bere hitzaldian, Europeana Europako Liburutegi Digitalaren rola azpimarratu du (Euskariana bertako kidea da) hainbat gobernu edukiak digitalizatzeko eta eskuratzeko egiten ari diren ahaleginak bateratzeko, baita hizkuntza desberdinetan ere. Bestalde, “ezin dugu ahaztu liburutegiak erabiltzaileak hezten ari direla, eta, aldi berean, Europan erregulazio argi baten beharra aldarrikatzen dutela, sortzaileen kolektiboaren eskubideak babesteko”, adierazi du Ibone Bengoetxeak.
Europar Batasuneko Hezkuntza, Gazteria, Kultura eta Kirol Kontseiluan euskal koordinazioa proaktiboa izan da seihileko honetan, eta, gainera, mugarri bat bete da, Hungariako Kontseiluak eta Lehendakaritzak proposatutako testuari zuzenketak aurkezteko aukera eman baita (aurkeztutako 15 zuzenketetatik 12 gehitu dira). Era berean, Ministro Kontseiluaren azaroaren 26ko bilkura egin da, eta autonomia-erkidegoek puntu horretan jarrera bateratua izatea lortu ere.
